Bala, di granada, ang nakapatay sa `tulisan’

BALA, di granada, maoy nakapatay sa gidudahang tulisan nga si Faustino Navarro Jr., 30, sa ginukdanay niini tali sa kapulisan niadtong Huwebes sa udto sa Sitio Tigbao, Barangay Talamban, dakbayan sa Sugbo.

Kini maoy gibutyag ni Dr. Rene Satur, chief medico-legal sa PNP-Crime Laboratory 7 dihang nahinabi sa Sun.Star Superbalita.

Matod niya nga sa iyang paghiling sa lawas ni Navarro atol sa autopsy, dunay samad pinusilan sa wa matinong armas ang tuong ulo niini nga nilapos sa walang habig.

Hinungdan nga dako ang iyang pagtuo nga dunay tawo nga nakapabuto sa iyang armas atol sa maong insidenti.

Ang samad sa ulo maoy nakapatay diha-diha kang Navarro, di ang dagkong mga samad niini nga naigo sa granada.

Siya nipasabot nga ang samad gikan sa granada di makapatay diha-diha kaniya kay wa may vital organs nga nadaot.

Mamatay man tuod si Navarro mataudtauran pa kay mahutdan sa dugo.

Hinuon di siya makasulti kon si kinsa ang nakaigo sanglit nagpaabot pa man sila sa resulta sa paraffin test sa mga kamot sa namatay, ingon man sa pag-eksamin sa Scene of the Crime Operation (Soco-7) sa armas.

PARAFFIN TEST

Giklaro ni Satur nga mas makaayo sab hinuon nga moboluntaryo sa ilang kaugalingon sa pagpaubos sa paraffin test ang mga pulis sa Talamban nga maoy ningrespondi aron sa pagsuta kon nakapabuto ba sila o wala.

Gipasabot niya nga kon basihan ang mga samad ni Navarro, nga naputol ang walang pulso human mabungkag ang mga kuyamoy lakip sa walang tiil, di gilayon kini mamatay.

Tungod kay hinayhinay lang siyang makabsan sa kinabuhi gumikan sa daghang dugo nga
moagas hangtud siya mahutdan og dugo.

“Fatal man gud to ang samad pinusilan sa ulo. Diretso na gyud siya sa pagkamatay kay sa samad sa Granada. Bisan kon nabungkag ang iyang pulso sanglit ang mga samad sa lawas mga ginagmay nga agi sa splinter,” pasabot ni Satur.

ANDAM SA IMBESTIGASYON

Si Sr. Insp. Michael Angelo Beltran, hepe sa Talamban Police nga nahinabi sa Sun.Star Superbalita nagkanayon nga sa pagkakaron dili lang una siya mohatag og mokomentaryo sa
resulta sa autopsy sanglit wa pa siya makadawat sa official nga kopya niini.

Hinuon gihangop niya kon dunay mga imbestigasyon labot sa kaso sanglit alang kaniya kabahin lang kini sa risgo sa ilang trabaho.

Andam usab siya nga ipa-ubos sila sa paraffin test kon gikinahanglan, apan hugot niya nga gibarugan nga wa gyud sila makapabuto sa ilang mga armas atol sa maong insidenti.

Ang iyang mga sakop wa sab mopabuto sa ilang mga armas atol sa ginukdanay.

Gibutyag sa kapulisan nga nadakin-as si Navarro dihang gibitbit niini ang granada hinungdan nga nabuthan ug namatay.

Gipahibawo ni Beltran nga si Virgilio Maquiling, 62, minyo, panday, taga Martires, Cebu City, ilang gibuhian alas 3 kagahapon sa hapon human way mga ebidensiyang mag-link ngadto kang Navarro.

`TULISAN’

Samtang Si Insp. Jaime Tolentino, hepe sa Aloguinsan Police nga nahinabi sa Sun.Star Superbalita, nikompirmar nga si Navarro, banggiitang tulisan sa ilang lungsod nalambigit sa pagpamaligya og drugas sa dugay nang panahon.

Gibutyag niya nga daghang mga pagpanulis nga nahitabo sa lungsod sa Aloguinsan nga nalakip si Navarro, ingon man mga alias warrant apan pwerting idlasa mao nga wa gyud nila madakpi.

Sa ilang ronda nga gipahigayon niadtong Septembre 17, 2011, didto sa balay niini sa Barangay Punay, dihang nagpahigayon og fiesta, nakaipsot kini.

Apan nasikop ang higala niini nga si Robin Silva, 34, minyo taga Alaska, Mambaling dakbayan sa Sugbo, nakuhaag upat ka bulto nga shabu ug gibalhog karon sa Cebu Provincial Detention and Rehabilitation Center (CPDRC).

Matod ni Tolentino nga si Navarro nalakip sa warrant of arrest sa kasong pagpanulis niini niadtong Disyembre 30, 2011 sa Barangay Esperanza, Aluguinsan.

Uban niini si Reynante Reiza, 28, ulitawo, taga Tabunok, dakbayan sa Talisay, kinsa naghikog sulod sa selda sa Aloguinsan police niadtong Enero 2, 2012 sa alas 5 sa kadlawon.

Gibiktima sa mga tulisan si Maria Victoria dela Cerna, 51, anyos, kinsa nakuhaan ogP6,930 human nagkobra sa kwarta sa usa ka pawnshop.

Lakip sa nakuha sa biktima ang P6,000 nga Chinese gold necklace.

Apan gidelamas si Reiza, kay ilang nadakpan sa roadblock sa may Barangay Poblacion human nisibat samtang si Navarro nakasibat.

Daghang mga mga reklamo nga ilang nadawat sa police station batok kang Navarro, tungod sa pagminaldito usab niini.

Mga habal-habal driver nangreklamo kay manion sa iyang armas kon mauli diha sa ilang lugar.

Gipadayag ni Tolentino nga nalipay ang mga lumolupyo sa Aloguinsan, ingon man sila sa kapulisan nga namatay si Navarro sanglit naghatg kinig labad sa ulo diha sa ilang lugar.