Asawa, 'kabit' gi-ambush

ASAWA kuyog sa lalakeng giingong iyang kabit gi-ambush sa bana niadtong Biyernes sa alas 8 sa gabii sa Sityo Bohol-Bohol, Brgy. Looc, dakbayan sa Mandaue.

Tungod sa samad pinusilan sa ulo, ang babaye namatay diha-diha, samtang ang lalake kinsa giingong ulitawo naa sa usa ka tambalanan gidala.

Ang bana nga nasikop sa follow-up operation sa kapulisan sa Mandaue City Police Office (MCPO) giingong niangkon sa krimen.

Ang tinuod nga mga ngan sa magtiayon gipugngan ning mantalaan kay duna silay duha ka mga anak.

Matod ni PO1 Victor Ato sa Homicide Section sa MCPO, nga sila si Liza (di tinuod niya nga ngan), 34, cashier sa usa ka gasoline station, ug ang giingong iyang uyab nga si Armando Irog-irog, 41, taga Poblacion, lungsod sa Liloan, nagsakay sa motorsiklo nga gimaneho sa nauwahi.

Paghiabot sa nahisgutang lugar, gidasmagan sila sa duha ka mga tawo nga nagmotorsiklo og Honda XRM nga blue ug pulos nagsul-ob og helmet.

Sa pagkalamba nila ni Irog-irog ug Liza, nihunong ang duha ka mga killer, nikanaog ang angkas nga armado og pusil dayon nipusil sa mga biktima.

Matod ni Ato nga nahinabi sa Sun.Star Superbalita nga unang gipusil ang babaye tumong sa lawas ug ulo nga nakaingon sa iyang hinanaling kamatayon.

Gisunod usab si Irog-irog kinsa naigo sa ulo ug kamot ug nadala sa usa ka tambalanan sa dakbayan sa Sugbo.

Daling ningsibat ang mga suspek human sa pagpamusil.

Sa ilang imbestigasyon, matod ni Insp. Ramil Morpos, hepe sa Homicide Section, nitumaw nga nagkabuwag sila si Liza ug ang iyang bana niadtong 2004.

Tungod niini, ilang gipangita ang bana hangtod nga ilang nasubay nga naa kini sa usa ka motel nagtrabaho isip kusinero.

Si Morpos niingon nga ilang nasikop si Bob, kinsa sa una nilang interogasyon niangkon nga siya ang gunman.

Iyang gihulagway nga sabog ang suspek dihang ilang nasikop.

Ang suspek anaa gitanggong sa Station-5 samtang padayon pa nilang gipangita ang driver sa motorsiklo kay wa motug-an ang suspek.