BRT di hulga sa drivers, operators

MAS hapsay ug dali ang biyahe kon magsugod na pag-operate ang bus rapid transit (BRT) system sa dakbayan sa Sugbo sa 2015.

Mao kini ang gipasalig ni Colin Brader, managing director sa Integrated Transport Planning Ltd. sa gipahigayong media briefing kagahapon aron ipasabot ang konsepto sa BRT.

Si Brader nigamit og digital presentation sa iyang pagpakita kon asa mosubay ang mga bus, gidak-on sa bus stations ingon man kausaban sa mga karsada nga agi-an niini.

Sila si Mayor Michael Rama ug Kongresista Tomas Osmea kinsa pulos nagduso sa BRT, nagkaabot kagahapon sa udto atol sa kalihukan sa Cebu Grand Convention Center.

Unang niabot si Osmena ug paglabay sa pipila ka minutos niabot sab si Rama ug hapit sila magkasugat sa pultahan sanglit adunay gi-order ang kanhi mayor.

Ang kanhi mayor nilingkod sa laing lamesa samtang si Rama nilingkod tupad sa mga executive officer sa mga pamantalaan samtang namulong si Brader.

Si Brader nitug-an atubangan sa mga tigbalita nga hingpit nang mahuman ang feasibility study sa BRT.

Kon ipatuman na kini, ipakatap ang 240 ka mga bus nga maglagbas gikan sa Barangay Bulacao paingon sa Ayala Center Cebu ug lahos sa Barangay Talamban, nga adunay 15 kilometros nga gitas-on.

Siya niingon nga di angay mabalaka ang mga driver ug operators sa mga PUJ kay apil sila sa pagpadagan sa BRT.

Matod niya nga adunay 480 ka mga driver nga bahinon sa duha ka mga shifting nga magsugod sa alas 6 sa buntag hangtod alas 12 sa tungang gabii.

Ang mga driver nga i-hire magagikan ra sab sa mga PUJ driver nga maapektuhan sa pagpatuman sa BRT.

Gawas niini, duna pay mga support staff, sama sa mobantay ug mopadagan sa BRT stations nga magagikan gihapon sa hut-ong sa mga operator ug driver sa PUJ.

Siya nipasabot nga kini gihimo na sa nasod sa Nigeria nga nagpatuman usab sa BRT system.

Gipaneguro usab niya nga ang pletihan pareha ra sa mga PUJ apan mas paspas ang biyahe kay magsubay kini sa lahi nga lane ug mohunong lang og kadiyot kaayo aron mopakanaug ug mopasakay og mga pasahero.