One Cebu maghuwat sa pahibawo sa Bakud

MAGPAABOT ang One Cebu sa pormal nga pagpahibawo sa Barug Alang sa Kauswagan ug Demokrasiya (Bakud) party kon magpabilin ba o mabungkag ang ilang alyansa sa pulitika sa 2013 election.

Si Kongresista Pablo John Garcia sa ikatulong distrito ug gubernatorial candidate sa One Cebu niingon nga isip kaabay, sila nagpaabot sa mga lider sa Bakud party nga mopahibawo sa unsa may mahitabo nga kausaban sa ilang panag-alyansa.

“As an ally, One Cebu expects that the leaders of Bakud would meet with us to announce any major change in alliances, in accordance with the spirit of openness and courtesy both parties have exercised and have come to expect through the years.” padayag sa kongresista.

Base sa report, naselyohan na ang panagpares nila ni Bise Gobernador Agnes Magpale ug Atty. Hilario “Junjun” Davide III, provincial chairman sa Liberal party alang sa umaabot nga piniliay human sa nahitabong panagtagbo uban si Presidente Noynoy Aquino didto sa Malacañang niadtong Huwebes.

Si Yamie Vestal, tigpamaba ni 5th district Cong. Ramon “Red” Durano VI nikompirmar sa Sun.Star Cebu nga ang mga lider sa Bakud nga sila si Danao City Vice Mayor Ramon “Nito” Durano III, Cong. Durano, Magpale ug Davide nakighimamat ni Aquino didto sa Malacañang.