Sugbo pahigayunan sa labing dakong kalihukan sa simbahan

USA ka dakong panalangin inubanan sa dakong responsibilidad ang pagpili sa Vatican sa dakbayan sa Sugbo isip sunod nga lugar nga pahigayunan sa sunod nga International Eucharistic Congress sa 2016.

Mao kini ang paghulagway ni Msgr. Esteban Binghay, episcopal vicar sa Artsidyosesis sa Sugbo sa laing dakong kalihukan sa Simbahang Katoliko.

Si Pope Benedict XVI nipahibawo nga sa Cebu City ipahigayon ang ika-51 nga International Eucharistic Congress atol sa pagtapos sa maong kalihukan nga gipahigayon sa Dublin, Ireland sa miaging semana.

“To the people of the Philippines I send warm greetings and an assurance of my closeness in prayer during the period of preparation for this great ecclesiastical gathering. I am confident that it will bring lasting spiritual renewal not only to them but to all the participants from across the globe,” matod sa Santo Papa.

Matod ni Binghay ang International Eucharistic Congress usa ka dakong kalihukan diin daghang mga nasod ang nagtinguha nga adto kini mapahigayon sa ilang lugar.

“Usa gyud ni ka panalangin nato at the same time ubanan sad og dako nga responsibilidad. Daghang nag-ilog gani ani kay dako ni nga kalihukan daghang mga personalidad ang manambong,” paambit ni Binghay dihang nahinabi sa Sun.Star Superbalita.

Siya nidugang ang hagit sa Sugbo nga kinahanglan maandam ang mga tawo sa espirituhanon nga kabag-uhan ug sa samang higayon magkinahanglan og dakong pundo alang sa mga galastuhan.

“You have to prepare the people spiritually. And materially sad mag-prepare para sa mga galastuhan kay dako man ni,” dugang pa niya.

Sa buwag nga interview sa Sun.Star Cebu ni Msgr. Achilles Dakay, tigpamaba sa Artsidyosesis sa Sugbo, siya niingon nga ang Archdiocese of Manila ni-host sa maong Congress niadtong 1937 atol sa panahon ni Pope Pius XI.

Ang Arsobispo sa Manila niadtong higayona mao si Archbishop Michael O’Doherty samtang dinhi sa Sugbo mao si Archbishop Gabriel Reyes.

Si Dakay niingon nga dunay igong panahon ang Archdiocese of Cebu sa pagpangandam sa maong kalihukan bisan og nangandam usab ang mga opisyal sa Simbahang Katoliko sa Sugbo sa gikatakdang canonization ni Blessed Pedro Calungsod karong Oktubre 21 didto sa Vatican.

Si Cebu Archbishop Jose Palma, usa sa mga delegado sa Congress didto sa Dublin, Ireland nga gipahigayon niadtong Hunyo 10-16, 2012 uban sa laing Pinoy nga mga Obispo apil na si Cabanatuan Bishop Sofronio Bacud , pangu sa Committee on Eucharistic sa Catholic Bishops Conference of the Philippines (CBCP).