2 ka langyaw gikiha sa pagpangawat

DUHA ka mga langyaw ang gipasakaan og kasong pagpa­ngawat sa lungsod sa Badian, Sugbo niadtong milabayng semana.

Nag-atubang og kasong robbery mao sila si Danish national Michael Riis ug American national Thomas Leroy Cooper sa Cebu Provincial Prosecutor’s Office.

Giingong anak sa usa ka Emerlinda Taboada ang nakautang og P5,000 kang Riis ug wa ki­ni makabayad sa iyang utang.

Mao kini hinungdan nga sila si Riis ug Cooper ningguba sa atubangang pultahan sa balay ni Taboada sa Barangay Malhiao sa samang lungsod.

Nisud ang mga langyaw sa balay ug giingong gikuha ang duha ka television units nga nikantidad og P24,000, duha ka speakers nga nikantidad og P3,000 ug duha ka mga charger sa cellphone nga nikantidad og P500.

Nunot sa gibuhat sa duha ka mga suspek, gireklamo sila sa kapulisan hinungdang napasaka ning kaso sa piskaliya sa lalawigan sa Sugbo.

Matod ni Taboada nga gipahibawo siya sa anak nga lalake pinaagi sa text message. Dihang nahitabo ang insidente didto siya sa lungsod sa Moalboal.

Ang iyang mga anak nga lalake nga silang Carlo ug Gerald diha sa balay niadtong higayona apan wa nila mapug­ngi ang gibuhat sa duha ka mga langyaw.

Dihang ilang gipaabot sa kapulisan ang insidente, ang mga pulis ningadto nilang Riis ug Cooper.

Naimbargo sa kapulisan ang ilang giingong gikuha nga mga butang human ang mga langyaw niuli niini ngadto sa tag-iya.

Ang duha ka suspek wa dakpa sa kapulisan.