5 gipangkiha og human trafficking
-A A +ASunday, June 24, 2012
GIPASAKAHAN na og kaso sa National Bureau of Investigation (NBI) 7 ang lima ka mga tawo nga gisikop nunot sa giingong trafficking human naluwas ang 26 ka mga babaye nga gigamit sa prostitusyon.
Ang lima ka mga suspek gitumbok sa NBI nga nakalapas sa Republic Act (RA) 9208 kon Anti-Trafficking in Persons Act hinungdan nga gisang-at ang reklamo sa Cebu City Prosecutor’s Office.
Tulo sa lima ka mga suspek ang gidala sa piskaliya niadtong Sabado alang sa inquest proceedings.
Ang duha sa lima ka mga suspek padayon pang gipangita sa mga awtoridad.
Nalatid sa balaod nga di nato pwede mahisgutan ang mga pangalan sa mga nalambigit sa
kaso.
Nasayran nga ang NBI 7 uban sa Department of Social Welfare and Development (DSWD) ug International Justice Mission (IJM) nihimo sa pagpangronda niadtong Biyernes sa kaadlawon nga niresulta nga naka-rescue sila og 26 ka mga babaye.
Sa 26 ka mga babaye nga ilang naluwas sa Red Lips Bar sa Gen. Maxilom Ave., dakbayan sa Sugbo, lima kanila ang gituohang menor de edad.
Adunay unom sa 26 ka mga babaye anaa na sa hingkod ang panuigon. Ang nahabiling 20 ka mga babaye gipaubos pa karon sa pakisusi.
Ang tulo ka mga suspek kasamtangang anaa pa karon sa kustodiya sa NBI human nipirma silag waiver of detention kay tinguha nilang tubagon ang ilang giatubang nga reklamo.
Gihatagan silag 10 ka adlaw sa pagtubag.
Gipatik sa mantalaang SuperBalita Cebu Hunyo 25, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
