Piyesta ni San Juan, 3 nalumos sa dagat

TULO ang nangalumos atol sa pagsaulog sa piyesta ni San Juan de Baptist sa managla­hing dapit sa lalawigan sa Sug­bo kagahapon.

Unang nalumos mao si Elacio Delantis, 72, ulitawo ug taga Sitio Santa Cruz, Barangay Sacsac, Pinamungajan.

Nilutaw na lang nga nakit-an sa iyang manghud nianang alas 11:00 sa buntag sa kadagatan sa Barangay Tutay sa maong lungsod.

Si PO1 Marcelo Inso, desk officer sa Pinamu­ngajan police nga nahi­nabi sa Sun.Star SuperBalita, nagkanayon nga si Delantis, naligog sayo tungod sa San Juan nga piyesta.

Samtang naligo, nagkalingaw sab kini sa pagpamasol og isda mga alas 10:00 sa buntag kagahapon, apan kalit lang siyang nahanaw dihang nakit-an milutaw na kini.

Giingong giataki sa sakit sa kasingkasing si Delantis, sumala pa sa igsuon nga si Rolando hinungdan nga diretso kini sa pagkalumos nga wala gilayon makit-i.

Wala magdugay, alas 2:00 sa hapon, usa ka biyudo ang dead-on-arrival (DOA) sa ospital human nalumos samtang naligo sa dagat sa Sitio Tapon Barangay Tajao, Pinamungajan.

Sa imbestigasyon sa kapulisan sa Pinamu­ngajan, nasuta nga hubog ang biktimang si Elie Cabrera 60, anyos taga Barangay Cabiangon dihang naligog dagat.

Ang biktima gikatahong nag-inusara ra kining naligo sa nahisgutang dagat, apan tu­ngod sa kahubog wala na kini motunga dihang nisalom.

Ang mga nagpakabanang residente nga naligo sa dagat maoy nakakita niini nga milutaw gitabang gidala sa tambalanan apan DOA na.

Samtang namatay usab ang usa ka 62 anyos anyos nga ulitawong guwang human siya nalumos sa pagkaligo sa dagat mga alas 11:00 kagahapon sa buntag sa Talisay, Sityo Inamay, Barangay Arpili, lungsod sa Balamban.

Si Esmail Amoin, taga Laray 1, Barangay Buanoy, kanhi barangay tanod, patay nang napalgan sa iyang mga kauban.

Si PO3 Celso Diaz, imbestigador sa Balamban police, niasoy sa Sun.Star Superbalita nga si Amoin, naligo kini sa dagat sa Talisay Arpili, subay sa kapistahan sa San Juan.

Kuyog niini sila si Armando Navarro, Boy Formento, ug uban pa.

Samtang nalingaw sa pagkaligo sa dagat, nagkalingaw sab sila sa pag-inom-inom daplin sa dagat, apan ilang nabantayan nga kalit nga na­hanaw ang biktima.

Wala sab magdugay usa ka bata miduol kanila nipadayag nga taasag utong atong tawo nga nilangoy wala paman gyud motunga.

Gipangutana sa mga higala ang bata kun asa dapit nga milangoy ang biktima dihang ilang gisusi maoy nisugat sa ilang mga mata nga patay na kini human malumos.

Ang mga kabanay sa biktima nga taga dakba­yan sa Lapu-Lapu gipahibalo na sa kapulisan sa Balamban bahin sa pagkamatay sa biktima.