Kapin sa tuig nga bata gikidnap sa mall

GIDAGIT sa duha ka wala mailhing babaye ang usa ka tuig ug unom ka bulan nga bata sulod sa usa ka mall sa dalan Sanciangko, dakbayan sa Sugbo kagahapon sa alas 11:00 sa buntag.

Si Jake Simbajon, usa ka tuig ug unom ka bulan, kalit lang gikuha sa duha ka mga babaye nga nagpailang paryente sa iyang amahan.

Si Diana, 21, usa ka katabang ug taga lungsod sa Tabuelan, apan naminyo sa taga Barangay Palanas, lungsod sa Ginatilan, nangayo’g pakitabang ni Chief Inspector Bonifacio Garciano, hepe sa Investigation and Detective Management Branch (IDMB) sa Cebu City Police Office (CCPO).

Si Diana nagkanayon nga gikan sila sa Tabuelan kay namista niadtong Sabado apan sa wala pa sila mopauli sa Ginatilan, nihapit sila sa mall kagahapon.

Ang iyang maguwang nga ni Diana nga si Gina, 29, maoy nagkugos sa iyang anak nga si Jake nga nagsul-ob sa jersey t-shirt didto sa taas sa mall.

Si Diana mipalit ug pagkaon apan sa iyang pagbalik, wala na ang iyang anak. Dihang gipangita na niya ang maguwang nga si Gina, nipahibalo nga gikuha sa duha ka mga babaye nga gituohan niyang igsuon sa bana niini.

Ang duha kalit nga niduol ug mipadayag nga silay modala sa bata kay silay magdugngan sa pagpamauli ngadto sa Ginatilan.

Si Diana daling nitawag sa iyang bana nga usa ka construction worker, apan giklaro niini nga wala niya sugoa ang iyang igsuon sa pagkuha sa bata.