2 ang gunman?

DI lang kay usa ra ang gun-for-hire ang ningpusil patay kang SPO2 Roberto Canencia, 52, niadtong Lunes sa alas 11:48 sa buntag sa Barangay Poblacion, dakbayan sa Danao.

Si Supt. Ricky Delelis, hepe sa Danao Police dihang nahinabi sa Sun.Star Superbalita nagkanayon nga tataw nga giplanuhan og maayo ang pagpatay kang Canencia sa mga killer nga nagsakay sa motorsiklo.

Siya dako og pagtuo nga duna pay laing mga gunman sa lugar nga nag-atang sa maong pulis.

“Mga hired killer gyud ning nipatay kaniya. Dag­hang nag-atang (niya). Shooter (hingigo) man gud niya si (SPO2 Canencia) hinungdan nga giseguro sa pagpusil nga sa dughan,” dugang ni Delelis.

Sa pagkakaron duna silay di mominos 10 ka mga saksi nga ninghatag nilag impormasyon labot sa insedenti.

Apan usa sa ilang mga problima kay di maka-identify ang mga saksi sa killers kay pulos nag-bonnet, naka-shades ug nagsul-ob og full-face helmet.

Hinuon duna silay nakuhang footages gikan sa CCTV camera sa Aspac Bank nga nakit-an nga niagi si Canencia sakay sa iyang motorsiklop nga gisundan sa puti nga motorsiklo nga dunay angkas.

Ang pagbalik sa puti nga motorsiklo nakita sa CCTV camera, apan wa makita ang pagpusil sa pulis.

Hinuon, sa ilang nakuhang impormasyon gikan sa mga testigos nga dunay laing motorsiklo nga nisugat ug nipusil sab kang Canencia ang sakay niini..

Karong adlawa ilang tan-awon ang footage sa CCTV camera sa Oro China Pawnshop nga nahimutang sa duol nahitaboan sa kremin aron ilang makita kon naa ba ang pagpusil ug ang ubang mga killer.

Samtang si Sr. Supt. Patrocinio Comendador, director sa Cebu Provincial Police Office
(CPPO) nga nahinabi sa Sun.Star Superbalita nagkanayon nga gipatabang na niya sa imbestigasyon ang Provin­cial Intelligence Branch (PIB) ug Provincial Investigation and Detective Mana­gement Branch (PIDMB) ngadto sa kapulisan sa Danao.