80 anyos modagan batok kang Kongresista Radaza

ATTORNEY Silvino Garcia Maceren Jr. mipadayag sa iyang interest nga magmapili pagka-kongresista sa Lapu-Lapu City, atbang ni incumbent Representative Arturo Radaza.

Ang 80-anyos nga abogado misaysay sa iyang platform of governance nga mao ang paghatag og improvement sa dakbayan nga giingong nataligam-an sa paghatag og pagta­gad sa kasamtangan pamunuan.

Gihisgutan ni Mace­ren ang dakong panginahanglan alang sa road improvement, pagpalapad sa kayutaan pinaagi sa pag-reclaim sa mga hunasan gikan sa barangay Punta Engaño ngadto na sa barangay Ibo ug magbilin og white sand area alang sa public beaches.

Ang maong reclaim areas itagana alang sa patigayon (katukoran og edipisyo), sports ug kalingawan sa mga Oponganon sama sa pagpangaligo sa public beach.

Iya usab nga gipangandoy ang pagtukod og kalsada o tulay nga manukad sa barangay Babag subay sa sityo Timpolok, lahos na sa kalsada sa barangay Basak.

Ingon man ang kalsada nga manukad sa Basak nga mosubay sa Mactan Benito Ebue Air Base nga molagbas sa Marcelo Fernan Bridge aron nga kaminusan ang nagkahuot nga trapiko ug kaminusan ang travel time sa mga motorista ug sumasakay.

Gihisgutan usab niya ang criminality rate sa dakbayan nga angayan nang kaminusan
pinaagi sa mga barangay kapitan sa matag barangay nga moabag sa responsibilidad sa pagbadlong niadtong mga badlungon diha sa ilang tagsa-tagsa ka mga dapit.

Paghatag usab og libre nga livelihood workshop sa mga konstituente nga walay mga trabaho.

“These important ideas which are overlooked by the present administration,” tipik sa pamahayag ni Maceren sa dihang nahinabi sa Sun.Star Superbalita.

Pakigtagboan ni Maceren si Bise Presidente Jejomar Binay sa United Nationalist Alliance (UNA) aron hangyuon nga isabak sa ilang partido ilabi na nga wa pa kiniy opisyal nga kandidato pagka-kongresista sa Lapu-Lapu isip lone district.

Kahinumduman nga nagpapili kaniadto si Maceren isip representante sa 6th District niadtong 1998 diin nasakop pa kaniadto ang Lapu-Lapu sa maong distrito, apan naparot kini ni kanhi kongresista Ernesto Herrera.

Si Atty. Maceren kinsa residente sa barangay Gun-ob, Lapu-Lapu nahimong personnel ug legal counsel sa General Milling Corporation sulod sa walo ka tuig, nahimong magtutudlo sa law dungan sa iyang private practice sud sa pipila ka mga tuig ug nalambigit sa real estate business.

Gitug-an ni Maceren nga pipila ka mga sakop sa iyang kabanay ang supak sa iyang pag-apil apil sa pulitika human sa pait nga kaagi niini niadtong 1998 elections nga migasto og P15 milyones nga giingong gipanapi ra sa mga tawo.

Apan ang tigpamaba sa mga Radaza nga si Jonjie Gonzalez mipaabot sa ilang mensahe pinaagi sa text message nga nagkanayon: “Klaro nga si Atty. Maceren dili sweto sa trabaho sa usa ka kongresista. Kung naa may guba nga dalan sa Lapu-Lapu, di man na trabaho sa congressman apan ang pagpanday og balaod.”

“Ang pagkahimo sa La­­pu-Lapu isip usa ka highly urbanized city nga ka­­ron nahimong political­ly independent ug lone dis­trict namugna pinaagi sa paningkamot ni Cong.
Radaza, (sa dihang siya pay mayor sa siyudad),” pamahayag ni Gonzalez.