Lalakeng gituohang gi-salvage napalgan

PATAYNG lawas sa usa ka lalake ang napalgan sa bakanting luna sa Barangay Tungkop,lungsod sa Minglanilla,Cebu pasado ala s 6 kagahapon sa buntag.

Ang biktima wa pa ilha sa kapulisan sa pagsuwat ning balita tungod kay wa pa may mga tagtungod nga nagpakita.

Si Chief Inspector Tim­mar Alam, hepe sa Minglanilla police station nitug-an sa mga tigbalita nga di pa mahibaw-an ang hinungdan sa kamatayon sa biktima kon gipusil ba kini o gibunalan sa gahi nga butang.

Duna hinuoy kabhang sa armas ang nakit-an duol sa dapit nga nahagbaan sa biktima.

Matod ni Alam nga 10 metros gikan sa nagbuy-od nga biktima, dunay gia­ban­donar nga motorsiklo nga way silingan nga naka­ila kon kinsa ang tag-iya.

Dunay mga nakitang dokumento sud sa U-box sa motorsiklo apan managlahi ang ngalan sa rehistro, lisensya ug dunay card sa usa ka mall.Lahi gihapon ang nakabutang nga ngalan.

Way nakuha nga ID sa bolsa sa biktima.

Kini nagsul-ob og itom nga t-shirt, blue nga shorts, dunay gibanabanang gitas-on nga 5’3” ngadto sa 5’6”, panuigon gikan sa 30 ngadto sa 40-anyos ug tabunon ang pamanit.