Silot nga pisikal gidili sa ordinansa

GIAPROBAHAN na sa konseho ang pagdili sa corporal punishment human naoktaba og usa ka semana ang pagpalabang niini atol sa ilang regular session kagahapon.

Sa maong ordinansa, gidili na ang pagpanagmal sa mga ginikananm magtutudlo, yaya, mga katabang ug caregivers, foster parents ug mga kabanay nga maoy nagkustodiya sa bata.

Kini sama sa sumbag, patid, bunal, sagpa, lapdos gamit ang sungkod, sapatos, stick, silhig. bakos ug uban pa. Gidili sab ang kusi, pag-inat sa buhok ug dunggan, pagputol sa buhok, paglabay og butang sa bata.

Pagpatrabaho sa bulohaton nga di mahimo sa bata agi og silot, paghulga sa bata pinaagi sa estorya ug pagpakauwaw sa bata sa publiko ug uban pa.

Apan ang tanan moagi pa sa hustong proseso pinaagi sa pag-imbistigar sa Department of Social Wekfare and Services (Dsws) ug kinahanglan ma-report ang panghitabo sud sa 24 oras.

Diriyot pa gyud unta ma-postpone ang pag-aprobar sa “ordinance promoting positive and non-violent discipline of children and providing penalties” human nipalabang og amendment si Konsehal Joey Daluz nga di lang i-apil ang mga ginikanan sa maong ordinansa.

Apan sila konsehal Lea Japson kinsa, principal author ug Alvin Dizon, wa motugot nga di iapil ang ginikanan sa maong ordinansa.