Sun Savings Bank mobukas sa ilang bag-ong buhatan

BUKSAN sa Sun Savings Bank ang ilang bag-ong buhatan sa ground floor sa Rosalie Bldg., Gaisano Grand Fiesta Mall, Tabunok, dakbayan sa Talisay.

Si Francisco A. Dizon, presidente sa banko, kinsa duna nay 37 ka mga tuig nga kasinatian isip banker, nipahibawo nga P200 lang ang minimum nga deposito niadtong gustong mobukas kanila og savings account.

Sa P200 nga minimum deposit, kini mo-interest og 3 porsyento per annum, nga mas taas pa kay sa gitanyag sa ubang mga banko, bisan niadtong dagko ug dugay nang nag-operate.

Si Dizon nipasabot nga ila kining gituyo aron bisan kadtong ordinaryo kaa­yong mga tawo madani sa pagtigom.

Ilang nakita nga daghan unta ang gustong magtigom sa mga banko apan di ganahan tungod sa kataas sa minimum deposit.

“Sa amin mababa lang. Pwede kang magbukas at P200 na minimum,” siya nipasabot.

Mga serbisyo nga ilang gitanyag naglakip sa salary, car loan ug pagpahuwam sa small-medium enterprise nga nagkinahanglan og capital sa pagpadagan sa ilang negusyo.

Sa samang higayon, iyang gibutyag nga bag-ohay lang sila nga gi-accredit sa Department of Education (DepEd) alang sa salary loan sa mga magtutudlo.

Siya nipasabot nga ang ilang loan interest mas ubos gihapon kon itandi sa ubang mga banko nga moabot pa gani og 19 porsyento per annum.

Bisan kon nagsugod lang sila pag-operate niadtong Marso 2011, iyang gipaneguro nga maayo kaayo ang kahimtang sa banko.

“We are very liquid,” dugang ni Dizon, dungan sa pagbutyag nga duna silay P65 milyunes nga deposito gikan sa ilang mga depositor.

Samtang nagpadayon pa sila sa pagpangandam alang sa pagpatuman sa ilang mobile banking system, ang mga depositor mogamit una og bank book.

Apan sayo sunod tuig, magsugod na sila sa ilang electronic banking nga ilang gitumong aron mas sayon sa ilang mga kliyente ang pag-transact.

Nag-target sila sa pagbutang og lima ka mga automated teller machine (ATM) nga ma-link up sa 10,000 ka ATM machines tibuok nasod.