2 ka kawani sa Kapitolyo naaktuhang `nag-shabu’

DUHA ka mga kawani sa Kapitolyo ang imbestigahon human giingon nga nag-pot session sud mismo sa buhatan sa Provincial Planning and Development Office sa miaging tungang gabii.

Base sa report sa mga gwardiya nga sila si Rosalio Tigli ug Roel Ilustrisimo nga nag-duty niadtong higayona, unang niabot sa Kapitolyo si Cirilo Abrenica, regular nga empleyado nga nadestino sa PPDO hapit na alas 12:00 sa tungang gabii ug nananghid nga duna siya’y kuhaon nga butang sud sa ilang buhatan nga naa mahimutang sa 3rd floor sa Kapitolyo.

Pipila ka minutos sunod nga niabot si Cyril Solita, casual employee nga dunay kuyog nga wa mailhing babaye ug nananghid nga mangihi ang iyang kauban.

Pasado alas 12:00 sa tungang gabii unang nigawas si Solita ug niingon nga mosunod lang
og gawas ang iyang kauban nga babaye.

Apan nagduda na sila si Tigli ug Ilustrisimo hinungdan nga ilang gisaka ang buhatan sa PPDO nga sirado ang pultahan apan wala naka-padlock ug nagsiga ang suga.

Didto ilang naaktohan si Abrenica kauban ang maong babaye nga giingong nag-pot session.

Matod ni Servillano Angcay, hepe sa mga gwar­diya nga nadestino sa Kapitolyo nga wala madakpi sa iyang mga sakop si Abrenica ug ang kaubang babaye gumikan kay nakadagan sila palayo sa buhatan sa PPDO.

Nakuha hinuon gikan sa maong opisina ang kagamitan sa paggamit og ginadiling drugas, duha ka lighter, usa ka cellphone, duha ka SIM pack, usa ka cutter, polo shirt nga gituohang uniporme ni Abrenica, usa ka paresan sa itom nga sapatos nga giingong iya gihapon sa maong kawani.