5 nangahilo, 1 patay, sa isda nga gipaniudto

LIMA ka mga tawo ang nangahilo, usa ka­nila namatay, human sila ningkaon sa isdang Dalapugan sa ilang pagpaniudto niadtong Martes ala 1:00 sa hapon sa Barangay Cansaloay, lungsod sa Oslob, Sugbo.

Si Epitacio Ferolino, 37, minyo, dunay walo ka mga anak, mananggiti, namatay alas 8 sa gabii sa niadtong Martes sa Oslob District hospital, apan na-report sa kapulisan niadtong Miyerkulis sa alas 3 na sa hapon.

Nakalingkawas sa kamatayon ang iyang asawa nga si Angelita, 32, inahan nga si Consuelo Ferolino, 65, silingan nga si Juanita Estenor ,62, ug si Max Filosopo, 35, minyo.

Apan namatay ang manok ug iro sa biktima human nikaon sa ilang gipangsuka.

Si PO3 Nelson Saqui­bal, imbestigador sa Oslob Police Station nga nahi­nabi sa Sun.Star Superbalita, nagkanayon nga si Max maoy nipalit sa isda sa merkado publiko niadtong Martes sa buntag.

Ang isda nga usa ka kilo ug ¼ mokantidad og P125 ug gipatagud gilayon niini sa tindera nga si Exuperia Frondoso.

Sa pag-uli niini, giluto gilayon niya pinaagi sa pagtula, giun-unan ug ang uban gipang-asinan kay gihimong tinabal.

Ang mga suod nilang silingan nga naapil sa pagkahilo gipang-imbe­tar sa pagpaniudto.

Apan si Ferolino pu­werting nakakaon sa mga tinai ug atay sa isda nga maoy paburito niini.

Ang ubang mga biktima unod lang maoy gikaon, samtang gi-swerte sab ang usa ka bata kay dihang gipakaon giluwa niini kay wala ganahi.

Ang mga naka-survive ningbutyag nga sa ilang paghigop sa sabaw sa tinula, ilang nabantayan nga apla o pait kaayo nga mopilit sa ilang tutunlan.

Paglabay sa 10 minutos nilang pagkaon, ang mga naka-survive nagsuka-suka sa kasakit sa ilang mga tiyan samtang ang uban niini nitumar lang og mga lana.

Si Ferolino wa gilayon kini maapektuhi apan pagkahapon nagsuka kalibang na hangtod sa sa pagkagabii hinungdan nga gidala sa tambalanan apan gideaklarar nga dead-on-arrival (DOA).

Sa ilang gihimong im­­­­bestigasyon, ang maong isda gikan sa usa ka Marlene Gumagay nga nakuha sa iyang bana ug gipalit sab ni Frondoso, kinsa nibaligya niini sa merkado.

Gihulagway ni Saqui­bal nga ang maong isda scavenger hinungdan nga nagtuo sila nga nakakaon kini og butang nga dunay kemikal.

Apan ilang giduso ngadto sa Bureau of Fi­sheries and Aquatic Resources (BFAR) ang mga kabahin sa maong isda nga ilang nakuha didto sa lugar nga naglakip pa sa tinula, inun-unan ug tinabal.

Matod niya nga ilang mahibaw-an unya kon diin gyud gikan ang hilo sa isda nga nakaon sa mga biktima.

Tungod kay si Gumabay ang unang nibaligya sa isda, siya nisulti sa mga pulis nga presko gyud ang maong isda dihang iyang gibaligya sa merkado.

Sa pag-inspection nila sa balay ni Max, diin giluto ang isda wala sab kiniy mga kemikal nga gitiner.

Ila untang giduso nga ipa-ubos sa autopsy ang lawas ni Ferolino, apan gipalubong gilayon kini niadtong Miyerkulis sa hapon.