Kalingawan sa piyesta gisanta sa brgy. kapitan

NAPALAW ang mga taga Punta Engaño, dakbayan sa Lapu-Lapu sa ilang gipaabot nga kalingawan sa CCTN-47 nga mopahigayon unta og stage drama niadtong miaging gabii, sa dihang gipa-undang sa kapitan ang kalihokan.

Gikuwestiyon ni Pun­ta Engaño barangay councilor Diosminda Ha­ya­shi ang gihimo ni Barangay Kapitan Lour­des Ibag nga nimando sa pagpahunong sa maong stage play sa rason nga walay permit sa barangay.

Gikahibulong ni Ha­yashi ang dili makiangayon ang gihimo ni Ibag, sang­lit ang ubang schedule fiesta activities nga una nang gipasundayag sa Punta Engaño covered court ang wala hilabti nga pulos usab way mga permit.

Naghinamhinam ang mga mga tawo sa pagsaksi sa maong stage drama nga giulohang “Sa Usa Lamang Ka Dios” diin nalakip sa cast si Hayashi sa dihang ang kapulisan sa Station II nga gipangulohan ni PCInsp. Conrado Manatad nimando nga dili na idayon ang kalihokan base sa city ordinance nga wala nay magsaba-saba lapas sa alas 10:00 sa gabii.

Nagbagutbot ug huyhoy ang abaga sa mga tawo nga napugos sa pagpa-uli sa dihang niabot ang mga pulis.

Nasuta sa kampo ni Hayashi nga na­nawag si Ibag ngadto sa Sta­­tion II nga nagmando sa hepe nga ipaundang ang maong kalihokan sa barangay.

Nagduda ang konsehala nga adunay pagdumot si Ibag kaniya diin usa na niini kadtong iyang reklamo nga oral defamation batok sa kapitan niadtong miaging tuig.

Giingong gikasuko ni Ibag ang feeding program nga gipasiugdahan sa mga sakop sa Lupon Tagapamayapa sa diha sa iyang barangay kansang financial assistance gikan ni Hayashi nga matod pa gipahunong kay wala masayod ang kapitan.

Ang maong kagubot naabot sa Municipal Tri­al Court in Cities (MTCC) apan nahusay ra sa dihang miuyon ang duha ka kampo og settlement.

Usa usab sa gidudahan ni Hayashi mao ang iyang aktibo nga kampanya batok sa mga gipalusot nga corals diha sa ilang dapit nga niresulta sa sunod-sunod nga pagsakmit sa maong mga export quality nga marine resources, sam­­­tang gihulagway nga walay gihimo ang barangay aron kini masumpo.

Gisuwayan sa mga tigbalita sa pagkuha sa habig ni kapitan Ibag ang wala kini sa barangay ingon man ang wala pagtubag sa mga text messages nga gipaabot kaniya.