Petisyon alang sa pagpakubos sa plete giduso ngadto sa LTFRB

NADAWAT na sa Land Transportation Franchising and Regulatory Board sa Central Visayas kagahapon ang petisyon sa Consumer’s Rights for Economic Welfare, Inc. (Crew) nga nag-awhag sa pagpa­kunhod sa minimum nga pletihan sa mga public utility jeepney.

Ang Crew pinaagi sa presidente nga si Vic Sapio niawhag sa LTFRB nga ibalik sa P6 gikan sa P7.50 ang minimum nga pletihan sa PUJ tungod sa sunodsunod nga pag-usos sa presyo sa mga produktong petrulyo.

Sa pikas bahin, ang maong grupo nihangyo usab sa LTFRB nga ipatuman sa labing madaling panahon ang pagpakunhod usab sa pletihan sa taxi labi na sa kasamtangan nga flag down rate gikan sa P40 ngadto na sa P30.

Awhag sa Crew sa maong ahensiya sa kagamhanan nga ipabilin sa P3.50 ang dugang pletihan sa taxi sa mosunod nga 250 metros aron dili maalkansi ang operasyon sa mga taxi operators ug driver.

Si LTFRB 7 director Ahmed Cui­zon nagkanayon nga ilang ipadala dayon sa kaulohan ang maong petisyon ug ang public hearing itakda sa Hulyo 5 sa alas 9:00 sa buntag.

Matod niya nga i-consolidate ang petition sa CREW sa ubang mga petisyon nga giduso gikan sa nagkalainlaing mga probinsya sa nasod.

Mangayo usab siya og katin-awan labot na sa gipangayo nga taxi fare reduction sa maong grupo.

Si Ryan Benjamin Yu, chairman sa Cebu Integrated Transport Service Cooperative (Citrasco) sa iyang bahin niingon nga wa siya’y pagsupak sa gipangayo nga rollback sa pletihan sa PUJ sa Crew.

Apan alang niya dako ra kaayo ang P1.50 nga pagpakunhod sa minimum nga pletihan.

“Way problema nato ang ilang gipangayo nga rollback pero para nako dili ta kahatag anang P6 kay grabe ra na kaubos. We are willing nga ibalik sa P7,” padayag ni Yu dihang nahinabi sa Sun.Star Superbalita kagahapon.