Gisakripisyo tungod sa gugma

MALUWAS unta sa tinong kamatayon ang inahan nga namatay dihang gipaarakan sa tulo ka mga lalake ang ilang balay kon wa pa mobarog aron luwason ang ilang mga anak.

Naghapa unta sila si Jerome Sr. ug Prima Aying atol sa pagpangrakrak sa mi­­aging kadlawon sa Barangay Mactan, Lapu-Lapu City.

Apan tungod sa kahingawa niya sa iyang mga anak, nibarog siya apan igo lang nakatikang og kaduha, natumba kini ngadto balik sa iyang bana kay naigo sa mga bala.

Samtang gisang-at na kagahapon sa hapon ang kasong murder batok sa tulo ka mga magsuong suspek sa krimen.

Sa kahingawa sa iyang lima ka mga anak ug apo nga nangatulog sa ikaduhang andana sa ilang balay, bisan nag-uwan ang mga bala, si Prima, 42, nibarog aron unta sak-on ang ilang mga anak.

Asoy pa ni Jerome Sr., bana sa biktima, nga sa dihang nagsugod ang sagunson nga buto sa armas, iyang gigakos ug gipahapa ang iyang asawa sa sawog apan nagpunay og hilak ug milugnot.

Dihang kini nakabuhi gikan kaniya, nibarog kini.

“Nakatikang lang siya sa duha ka ang-ang sa hagdanan dayon nahagba ug dire na sa akong paa nahulog nga nag­kadugo na. Na-among na hinuon ang akong asawa,” asoy ni Jerome sam­tang nanglugmaw ang mga luha sa iyang mga mata sa dihang niasoy sa Sun.Star Superbalita sa hitabo.

Gihinganlan ni Aying ang ikatulong suspek nga kuyog sa managsuon nga sila si Demetrio, alyas Onyot, ug Jay Malingin nga mao si Deo nga giingong maoy nagsilbi nga lookout o back-up.

Nasayran nga sila si Jerome ug ang ma­­nagsuong Malingin second-degree cousins kay managsuon ang ilang apohan.

Samtang si P/Sr. Supt. Rey Lyndon Lawas, hepe sa Lapu-Lapu City Police Office, nagkanayon nga wa na kinahanglana nga moumol og task force alang sa dinaliang pagsulbad sa pagpamusil.

Gawas nga di kini usa ka highly sensational case, kompleto na ang iyang mga sakop sa mga gikinahanglan sama sa identification sa mga suspek, evidence ug private complainant.

Matod pa sa opisyal nga ang kapulisan sa Police Station II, Intelligence Branch lakip na ang Homicide Section maoy iyang gitahasan alang sa dinaliang kasulbaran sa krimen.

“Ang atoa ani is the immediate filing of the case and after ma-file, we will work on the arrest of these (Malingin brothers) suspects,” matod ni Lawas.

Matod ni Lawas nga nakig-alayon sila sa mga police unit sa silingang mga lungsod ug siyudad alang sa pagsikop sa mga Malingin.

Ang haya sa lawas sa biktima gipahimutang sa ilang balay sa sityo Proper, barangay Mactan.

Ang station commander sa Station II PCInsp. Conrado Manatad niingon nga sa matag karon ug unya mopahigayon sila og patrolya sa balay sa biktima.

Ang representante sa management sa Maitland Smith Corp. sa MEZ 1 diin kawani ang biktima niduaw sa Homicide Section kagahapon aron nga mangayo og police report sa nahitabo sa ilang empleyado.