Hapon `nakuhaan’ og shabu, gikiha
-A A +AFriday, June 29, 2012
GIPASAKAHAG duha ka mga kasong kalapasan sa Comprehensive Dangerous Drugs Act ang usa ka Japanese national human nakuhaag gidiling drugas ug mga butang alang sa pagsuyop niini.
Nasakpan si Nakagashi Kuyoshi, 53, nitibo sa Nishihama Wakayama City, Japan ug kasamtangang nagpuyo sa Barangay Guadalupe, dakbayan sa Sugbo, sa kapulisan dihang gireklamo siya sa Pinay nga asawa nga unom ka buwan nga mabdos kay gidagmalan siya niini.
Niini, si Kuyoshi gipasakaan og kasong kalapasan sa Section 11 sa Republic Act (RA) 9165 nunot sa paghupot niya sa giingong usa ka pakete sa shabu ug gilapas usab niya ang Section 12 kay nakuhaan siyag mga gamit alang sa pagsuyop.
Kasamtangang makalingkawas ang langyaw ning giatubang niyang mga kaso kay nirekomendar ang Cebu City Prosecutor’s Office nga siya makapiyansa og P240,000.
Nalatid sa reklamo sa kapulisan nga ang asawa ni Kuyoshi nga unom ka buwan nga mabdos
nireklamo kanila nga gidagmalan siya niini.
Ang Women’s Desk sa Guadalupe Police Station nihimog imbestigasyon sa reklamo kuyog ang asawa niini busa ilang giadto ang pinuy-anan niini aron sikupon kay nakalapas siya sa Violations against Women and Children Act kun Republic Act (RA) 9262.
Apan, didto nila nakit-an ang langyaw nga naghupot sa usa paketeng shabu ug mga kagamitan sa pagsuyop busa gisikop gilayon siya sa kapulisan hinungdan nga napasaka ning kaso sa piskaliya.
Gipatik sa mantalaang SuperBalita Cebu Hunyo 30, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
