Lola nga `nanablig’ og asido namikat sa biktima

LOLA nga wanted sa pagpanablig og asido nga nakapabuta sa iyang silingan namikat pa sa biktima dihang siya gidakop sa kapulisan kagahapon sa alas 11:30 sa buntag sa Barangay Cagay, lungsod sa Sibonga, Sugbo.

Nabulhog ang biktima tungod sa gibuhat sa suspek.

Si Trinidad Lopez, 66, minyo, nadakpan sa kapulisan sa Sibonga pinasikad sa warrant of arrest sa kasong serious physical injury nga giisyu ni Judge Leonardo Carreon sa Municipal Trial Court sa Argao nga gipitsahan niadtong Hunyo 27.

Nabuta ang walang mata sa biktimang si Lolita Pedros, silingan sa suspek, human gisabligan niya og asido niadtong Marso 29 sa miaging tuig.

Matod sa reklamo nga ang biktima nagpaabot sa iyang gibantayang bata sa usa ka daycare center sa ilang lugar.

Wa siya makabantay dihang kalit siya nga gisabligan og asido sa suspek hinungdan sa iyang pagkabuta ug nipasaka siya og kaso.

Gipasangil sa suspek nga gibugal-bugalan siya sa biktima nga usa siya usa ka tiguwang nga boang hinungdan nga iyang gisabligan og tubig.

Apan nasuta nga asido ang gisablig sa suspek ngadto sa biktima human nabuta ang usa ka mata niini.

Si SPO1 Jaime Mendoza, sa Sibonga Police nga nahinabi sa Sun.Star Superbalita, nagkanayon nga wa mosukol si Lopez dihang ilang gidakop dala ang warrant of arrest apan nikwesyton ang mga kabanay.

Ang korte nirekumendar og P12,000 nga piyansa ngadto kang Lopez bugti sa temporaryong kagawasan niini.

“Gipikatan sa iyang mata sa lola ang biktima dihang nadakpan namo siya,” dugang ni Mendoza.