Wa koy kahiubos, kasuko: PJ ngadto sa Bakud Party

BISAN og nabungkag na ang alyansa sa One Cebu ug Barug Alang sa Kauswagan ug Demokrasya, si Kongresista Pablo John Garcia, nagpasa­la­mat gihapon sa Bakud party nga ni-endurso sa iyang maguwang nga si Gobernador Gwen Garcia sa pagka senador sa 2013 elections.

Gipasalamatan usab niya ang Bakud sa duha ka tuig nga panag-alyansa sa pulitika sa nilabay nga duha ka eleksiyon.

Iyang gitino nga wa siya’y kayugot ngadto sa mga opisyal sa Bakud sa ilang pagbugto na sa alyansa sa One Cebu ug nakasabot siya sa ilang nakab-ot nga desisyon.

“I wish to assure them that there are no hurt feelings and we understand their position. Unya I’m glad that we can now move on and move forward,” matod sa kongresista dihang nahinabi sa mga tigbalita human sa inagurasyon sa bag-ong Enan Chiong Activity Center sa dakbayan sa Naga kagahapon.

Sa buwag nga interview ni Rory Jon Sepulveda, Capitol consultant ug tigpamaba sa One Cebu, siya nagkanayon nga wa pa sila makadawat og kop­ya sa resolusyon sa Bakud party nga nagkompirmar sa pakig-anib niini sa Liberal party ug ang pagsuporta sa parisan nila ni Atty. Hilario “Junjun” Davide III ug Vice Governor Agnes Magpale sa umaabot nga piniliay sa sunod tuig.

Si Garcia, kandidato pagka gobernador sa One Cebu, nidugang nga duna na sila gikonsiderar nga mga ngan nga pili-an sa pagka bise gobernador ug iyang maka-pares.

Iyang gipasalig nga human sa konsultasyon sa ilang partido, ilang itug-an ang pangan sa maong kandidato.

Samtang atol sa kalihukan sa Naga City, si Kong. Garcia gitawag ni 1st district Cong. Eddie Gullas nga mosunod nga gobernador sa lalawigan sa Sugbo hulip sa iyang maguwang nga si Gob. Gwen kinsa matapos na ang ikatulong termino sa sunod tuig.

Si PJ nga gikuhaan og reaksiyon labot niini nagkanayon nga “I hope that, that was an endorsement and I would like to consider that an endorsement of our candidacy.”

Iyang gipadayag nga ang labing mahinungdanon karon ang gipakita nga kahiusahan sa unang distrito tali sa One Cebu ug Alayon ang partido nga gipamunuan ni Kong. Gullas.

“I think the governor acknowledged that. I think Cong. Eddiegul acknow­ledged that.

Mayor Val Chiong acknowledged the part­nership.” dugang pa niya.

Iyang gibutyag nga tinguha sa ilang partido nga subling makigtagbo sa kadagkuan sa Alayon aron mapalig-on ang ilang alyansa.

Ang Alayon unang gikataho nga gipangulitawhan sa Liberal party pinaagi sa presidente niini nga si Transportation Secretary Mar Roxas aron makig-anib usab sa maong partido.

Apan matod ni Gullas nga nagpadayon pa ang maong negusasyon ug wala pa sila’y nakab-ot nga desisyon labot niini.