17-anyos nag-headset, naigo sa bus, patay

MENOR de edad nga nag-headset kay nagpatukar og music dihang nilabang sa karsada namatay kay nadasmagan sa naghaguros sa pagdagan nga Ceres Bus niadtong Biyernes sa alas 10 sa gabii sa Sitio Balitang, Barangay Granada, lungsod sa Boljoon.

Si Ritchie Arante, 17, ulitawo, nagpuyo sa nahisgutang lugar, namatay kagahapon sa buntag tungod sa grabeng kadaut sa iyang lawas human siya nadasmagan sa body number 8925 Ceres bus (GWK-771) nga gimaniho ni Glory Cris Gapol, 34, minyo taga Kinamangdagan, Lazi, Siqujor.

Si PO3 Reynaldo Rollon, desk officer sa Boljoon Police nga nahinabi sa Sun.Star Superbalita, nagkanayon nga ang biktima gikatahong wa gyud makabatantay dihang nilabang.

Kini tungod kay nag-headset kini sa pagpaminaw sa music.

Gisinggitan siya sa iyang mga higala nga dunay sakyanan nga nagpadulong kaniya apan nilabang gyud.

Ila na lang nakita nga naigo gyud ang biktima sa bus.

Si Gapol naningkamot gyud og nga di madasgan ang biktima apan tungod sa kalit nga paglabang, iya gyud nga nadasmagan si Gapol.

Gidala siya sa tambalanan apan kagahapon sa buntag ang mga kabanay mipahibawo sa police station nga namatay gyud ang biktima.

Ang driver didto na ni-surrender sa Oslob police station ug gi-turnover sa kapulisan sa Boljoon.

Kasong reckless imprudence resulting to homicide ang ipasaka sa kapulisan batok kang Gapol karong Lunes.