2 kritikal sa karambola sa basketball

BARANGAY konsehal naa sa kritikal nga kahimtang human nadunggaban samtang ang suspek nga iya ra sang silingan kritikal sab kay gipusil sa ilang barangay tanod human sa karambola niadtong Sabado sa alas 10:30 sa gabii sa Barangay Cambuhawe, lungsod sa Balamban.

Si Lubwig Taborada, 25, minyo, konsehal sa barangay ug chapter leader kaniadto sa Tau Gamma Fraternity sa lungsud sa Balamban, nakaangkon og samad dinunggaban sa iyang tiyan.

Kritikal sab ang suspetsadong si Floro Blanco, 54, ‘alias Odik,’ minyo, way trabaho, human naigo sa tampihak dihang gipusil sa tanod nga si Oliver Oleverio, paryente sa konsehal.

Si PO2 Godofredo Dumdum, desk officer sa Balamban police nga nahinabi sa Sun.Star Superbalita, nagkanayon nga si Taborada ug ang kaubang konsehal nga si Eric Roxas nag-referee sa liga sa basketball sa ilang barangay.

Apan nagkalalis sila si Taborada ug Blanco, human ang nauwahi nasuko kay wa maka-uyon sa desisyon sa konsehal.

Si Blanco nipasangil kang Taborada nga pabor sa ilang kaatbang.

Tungod sa ilang mainitong lalis, gidungab sa suspek ang barangay konsehal sa gidala niining kutsilyo hinungdan nga nabuslot ang tiyan.

Si Oliverio, kinsa paryente sa konsehal, nikuha sab sa iyang gidalang armas ug gipusil sa ulo si Blanco dayon sibat palayo.

Ang konsehal ug suspek pulos nalandig sa Balamban District Hospital, apan tungod sa ilang kahimtang nga pulos kritikal gibalhin sa tambalanan sa dakbayan sa Sugbu.

Si SPO3 Arvie Banate, imbestigador sa Balamban Police nga nahinabi sa Sun.Star Superbalita nagkanayon nga ang suspek naila nga badlungon sa lugar.

Matod niya nga halos kada adlaw ang suspek hubog ug kanunay nga magpabadlong.

Gipadayag niya nga samtang nag-referee si Taborada, wa siya makabantay nga nagpaduol ang suspek ug gikalitan siya sa pagdungab human sila magkalalis.