Dakbayan mopasiugdan og laing mass wedding

NAG-IPON apan wala mahatagi og bendisyon sa simbahan, duna nay kahigayonan nga makasal nga libre.

Alang lang kini mga lumolupyo sa dakbayan sa Sugbo ug ang magtiayon kinahanglan nga nagpuyo na og kapin sa lima ka tuig.

Ang kagamhanan sa dakbayan, pinaagi sa Cebu City Women’s and Family Affairs Commission (CCWFAC), mopahigayon sa ikapito ug sunodsunod nga mass wedding karong Septiyember 29 ning tuiga.

Sa mass wedding ang CCWFAC modawat hangtod 150 ka mga partisan ug tagal sa aplikasyon hangtod sa Agusto 31.

Ang mga gustong magpakasal gikinahanglang mosumiter sa ilang birth certificate, certificate of attendance of pre marriage counseling, barangay certificate, certificate of no marriage (Cenomar gikan sa NSO), pre-cana seminar, confirmation certificate, publication of marriage banns kun tawag, permit to marry gikan sa parokya , ug baptismal certificate.

Ang mga nanag-edad og 18 hangtod 24 gikinahanglan og pagtugot ug presensya sa ginikanan.

Ang mga aplikante mahimong mokuha og porma sa Kalipi office sa 2nd floor, Ramos Public Market, CCWFAC office sa 3rd floor, legislative building sa City Hall; DSWS Office sa Barangay Labangon, buhatan ni Konsehal Lea Japson sa City Hall ug sa GAD focal person sa nagkadaiyang barangay.

Kon makompleto na ang mga rekisito, isumiter ang aplikasyon sa buhatansa CCWFAC o Kalipi Office o makatawag sa 032-266-2198 o 516-5791 ug pangitaa lang si Ma. Socorro Alfafara.

Human sa pagsumiter iduso ang mga dokumento ngadto sa simbahan alang sa aplikasyon ug ang schedule sa pre-marriage counseling, interview uban sa Pari himuon.

Ang matag parisan gitugotan nga makadala og 15 ka bisita samtang ang venue sa reception padayon pang gipangita.

Ang kasal sugdan sa alas 9:00 sa buntag sa Cebu Metropolitan Cathedral uban sa mga opisyal sa City Hall pinangulohan ni Mayor Michael Rama.