Maestra gitigbas sa bana nga taga Navy

ULO sa maestra napahak human gitigbas sa iyang bana nga sakop sa Philippine Navy niadtong Lunes sa alas 9:30 sa gabii sa Sitio Suba, Barangay Poblacion, lungsod sa Argao, Sugbo.

Grabi ang kahimtang ni Pacita Binghit, 40, taga Barangay Lamacan, Argao, nagtudlo sa Argao National High School, kinsa kasamtangan nga giatiman sa mga doktor sa South General Hospital.

Nasikop sa kapulisan ang iyang bana nga si Petty Officer 3 John Binghit, 38, sakop sa Naval Forces Central (Navforcen) nga nakabase sa dakbayan sa Lapu-Lapu.

Si PO2 Von Tecson, sa Argao Police nga nahinabi sa Sun.Star Superbalita, nagkanayon nga ang biktima ug suspek gikatahong nagkabuwag human nasakit ang bana og nervous breakdown kun nalisoan sa pangisip.

Niadtong Lunes, nakig-estorya ang bana sa iyang asawa sulod sa balay sa uyoan sa babaye kay nihangyo nga makig-uli siya sa iyang asawa apan gikatahong wa mosugot ang maestra.

Di gusto ang biktima nga makigbalik sa iyang bana sanglit kanunay kining magselos ug kon motukar ang sakit sa pangutok, siya kulatahon niini.

Samtang nag-estorya sila, ang bana nananghid nga mangihi.

Wa magdahon ang biktima, samtang siya dunay gikaestorya sa telepuno, nibalik ang iyang bana nga duna nay dalang sundang ug gitigbas ang asawa.

Naigo ang biktima sa ulo ug duha ka mga kamot.

Nasikop hinuon sa kapulisan ang suspek ug nakuha ang sundang samtang ang biktima gidala sa tambalanan.

Gideretso sab ang suspek sa pagdala sa psychiatric ward sa Vicente Sotto Memorial Medical Center (VSMMC) aron sa pagpatambal niini.

Dugang ni Tecson nga ang bana sab gikatahong naburyong sab tungod sa pagselos ngadto sa iyang asawa, gawas sa sakit nga gihambin niini.

Samtang ulitawo nga guwang nga nailang palahubog sa ilang lugar patay na nga napalgang naglutawlutaw sa sa kagadagatan kagahapon sa alas 10:30 sa buntag sa Barangay Talaga, Argao.

Si Almorico Villafuerte, 65, way trabaho, nakit-an sa duha ka mga mananagat nga sila si Rafael Flores, 52, ug Jacinto Gilbolingo, 58.

Wa hinuoy foul play ang kamatayon sa biktima apan gisugyot sa kapulisan nga ipaubos sa autopsy ang lawas niini.