Mga bomba nakit-an sa Mandaue; Centcom naghuwat sa MCPO

GIPANEGURO sa Central Command (Centcom) nga ila gyung hipuson og tarong ang unexploded bombs nga napalgan sulod sa compound sa usa ka establisemento sa dan Hernan Cortes, dakbayan sa Mandaue.

Kana kon itugyan na kini kanila sa kapulisan sa Man­daue City Police Office (MCPO) ang 380 kapin ka mga bom­ba nga gituohang niadto pang Ikaduhang Gubat sa Kalibutan.

Ang mga bomba napalgan dihang nanglimpyo sa ilang luna ang mga trabahante sa establisemento.

Niadtong Lunes sa mga alas 6 sa gabii, ang mga pulis sa MCPO nga pinangulohan nila ni Supt. Josefino Ligan niadto sa mao nga dapit human makadawat og tawag si Insp. Ramil Morpos, hepe sa Station 2, gikan sa usa ka kabanay sa tag-iya, nga dunay duha ka truck sa mga bomba nga napalgan sa ilang luna.

Si Lt. Colonel Cristopher Tampus sa Central Command niingon nga wa silay igong pasilidad diin nila mahipos ang mga bomba.

Matod niya nga ang dunay katakos sa paghipos niini mao ang Explosives and Ordnance Division (EOD).

“Delikado sad sa among kampo kon amo ning tagoan. So, much better if we will dispose it properly,” nagkanayon si Tampus.

Siya niingon nga naghuwat pa sila sa MCPO nga mohipos niini.

Tungod kay niabot og 385 ka mga bomba ang napalgan, matod ni Tampus, nga di maayo nga magpabilin sa dapit ang mga bomba kay kuyaw kini sa mga residente.

Hinuon, sa mao nga gidaghanon, ang 35 lang maoy live samtang ang uban pulos na mga basiyo.

Ang MCPO, sa pagsuwat ning taho, mo-coordinate pa sa Centcom aron paghipos sa mga bomba nga pabuthon sa mas luwas nga dapit.

Ni-coordinate na sab ang MCPO sa Police Regional Office (PRO-7) kon unsay buhaton sa mga bomba.

Pipila ka mga buwan ang nakalabay, mga bomba nga napalgan sa South Road Properties (SRP) sa dakbayan sa Sugbo gipabuto didto sa dakbayan sa Toledo. JBT sa Sun.Star Cebu/dugang taho ni REV