Nanan-aw’g TV gipaarakan

KRITIKAL ang kahimtang sa duha ka manag-agaw human sila pauwani og mga bala samtang nagtan-aw sa telebisyon sulod sa panimalay niadtong Lunes sa alas 7:30 sa gabii didto sa Sitio Saksak, Barangay Abucyan, lungsod sa Balamban.

Si Warren Condiman, 17, sam­dan sa iyang liog, ug ig-agaw nga si Joseph Pardillo, 20, taga dakbayan sa Talisay sam­dan sa iyang tiyan human gipa­musil sa wala mailhing mga suspetsado.

Ang mga biktima, nalingaw sa pagtan-aw sa telibesyon sa wala pa mahitabo ang krimen.

Si SPO3 Arvie Banate, imbes­­tigador sa Balamban Police nga nahinabi sa Sun.Star Superbalita nagkanayon nga ang mga biktima gipasanginlang manguhag manok sa lugar.

Kini basi sa impormasyon nga iyang nakuha sa 14 anyos nga testigos nga naka-survive sa pagpamusil.

Matod pa niini nga ang minor de edad mibutyag nga sila maoy pasanginlan sa ilang lugar nga maoy responsabli sa mga pagpangawat sa mga manok.

Nunut niini gitutukan sa ka­pulisan nga posibling dunay na­ngasuko hinungdan nga gipamusil, apan walay nakakita sa mga suspetsado kinsa ngitngit ang lugar.

Gipadayag niini nga nagpaabot lang sa gawas ang duha ka suspetsado, dihang ni-abli sa purtahan ang 20 anyos aron mopalit sa segarilyo gipa-uwanan gilayog mga bala.

Walay kabhang sa armas nga narekober ang kapulisan didto sa crime scene.