Way certificate sa Dole, franchise di ma-renew
-A A +ATuesday, July 3, 2012
NAGPASIDAAN ang Land Transportation Franchising and Regulatory Board (LTFRB) sa Central Visayas sa mga kompaniya og bus nga kon way certificate of compliance gikan sa Department of Labor and Employment, hayan di ma-renew o maaprobahan ang ilang aplikasyon sa prangkisa.
Si LTFRB 7 director Ahmed Cuizon nagkanayon ang maong sertipiko maoy magmatuod nga ang usa ka bus company nituman sa balaod sa paghatag og tukmang sweldo ngadto sa mga drayber ug conductor og bus pinaagi sa ilang pirmahan nga payroll.
“Without this single piece of paper, it means that we’ll have bases to reject the application for the renewal of franchise,” sumala pa sa director atol sa 888 News Forum sa Marco Polo Plaza Hotel kagahapon.
Ang DOLE niluwat og Department Order no. 118-12 nga nagmando sa mga kompaniya og bus sa paghatag og insaktong suhulan sa mga drayber ug conductor ingon man overtime pay kon molapas sa walo ka oras ang ilang pagtrabaho.
Nagmando usab ni sa pagbayad sa membership premium sa Social Security System, Home Mutual Development Fund (Pag-ibig Fund) ug Philippine Health Insurance Corp.
Ang maong kamanduan ni-epekto sugod niadtong Hulyo 1 ning tuiga.
Matod ni Cuizon ang DOLE maoy tigpatuman niini ug maoy mangunay og inspeksiyon sa mga bus companies kon nituman ba niini.
Siya nidugang ang partisipasyon sa LTFRB sa maong kamanduan nga sugod sa Hulyo 30 sa higayon molukat o mo-renew og prangkisa ang mga bus companies, ilang susihon kon duna bay certificate of compliance gikan sa DOLE.
Kon wala ang maong sertipiko, dugang ni Cuizon duna sila basehanan nga dili i-renew ang prangkisa sa maong mga kompaniya.
Iyang gipahibawo nga atol sa tigom sa mga bus operators sa miaging semana nasabutan nga motuman sa maong kamanduan.
Si Julito Flores, presidente sa Cebu South Mini Bus Operators Association ug tigpamaba sa Cebu Provincial Bus Operators Association (CPBOA) sa sayo pa namahayag nga motuman ang mga bus operators sa maong lagda ug dili na sila modangop sa korte aron
pagkwestiyon niini.
Si Cuizon nidugang nga sa bus unang ipatuman ang paghatag og fixed salary scheme ug moabot ang panahon nga ipatuman usab kini ngadto sa mga mini bus, taxi ug PUJ.
Gipatik sa mantalaang SuperBalita Cebu Hulyo 04, 2012.
Balita
Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!
