Gullas mipahibawo sa kandidatura pagka mayor

GIPAHIBAWO na ni Kongresista Eduardo Gullas sa unang distrito sa Sugbo nga siya ang modagan sa pagka mayor sa dak­bayan sa Talisay sa 2013 election.

Apan ang pahibawo ni Gullas wa makasurpresa sa mga sakop sa oposisyon sa dakbayan sa Talisay.

Si Konsehal Romeo Villarante nitug-an sa Sun.Star Superbalita nga daan na nilang gitagna ang pagdagan ni Gullas pagbalik sa Talisay.

Kagahapong adlawa, si Kongresista Gullas nagpatawag og press conference nga nagpahibawo sa ilang tandem ni Bise Mayor Alan Bucao.

Si Mayor Socrates Fer­­­nandez nibalibad na sa tanyag nga mag bise go­ber­nador pares ni Kongresista Pablo Garcia ng maoy mag gobernador sa Sugbo.

Gilakip si Mayor Fernandez sa line-up sa mga konsehal sa grupo ni Gullas.

Sa iyang bahin, si Konsehal Villarante nangu­tana kang Gullas, “Is he alone can save Talisay? It’s time unta to pass the baton to Talisaynon.”

Matod sa konsehal nga kini nagpaila lang nga way salig si Gullas sa mga Talisaynon tungod kay siya naman sab ang mag mayor.

Gitataw ni Villarante nga silang mga sakop sa oposisyon mobutang gyud og kandidato nga iatbang ni Gullas.

Matod sa konsehal nga daghan sa mga Talisaynon ang nasuko gyud sa grupo ni Gullas ug ang 2013 election mao ang panahon nga sila makabawos.

Gidugang sa konsehal nga sa sunod nga elek­syon, tulo ka mga Gullas ang managan ug nagmatuod lang kini nga nagsugod na sila sa paghimo og political dynasty.

Si Konsehal Eduardo “Digul” Gullas magpasubli sa pagka konsehal sa Talisay, si Gerald Anthony “Samsam” Gullas magpapili pagka kongresista sa unang distrito ug si Kon­gresista Gullas mag ma­yor sa Talisay.

Samtang gipasabot ni Kongresista Gullas nga ilang itugyan ngadto sa katawhan ang paghukom sa ilang kandidatura ug dili dinastiya ang pagkabutang nila sa katungdanan.