Konseho mohilabot sa kaso ni Mike; mayor wa mabalaka

USA ka adlaw human nipahibawo si Kongresista Tomas Osmeña nga mosang-at og kaso batok kang Cebu City Mayor Michael Rama, ang Konseho manginlabot pinaagi sa pagpasar og resolution nga nagtugot kang Bise-Mayor Augustus Young nga makainterbener sa kaso
batok kang Department of Finance Secretary Cesar Purisima.

Naaprobahan ang motion to intervene sa ka­so.

Si Osmeña naglaraw nga mopasaka og kasong abuse of authority batok kang Rama ngadto sa buhatan sa Department of Interior and Local Government (DILG) ug iyang padad-an og kopya ang Malacañang.

Matod ni Osmeña nga gikiha ni Rama si Purisima in behalf sa dakbayan sa Sugbo nga way pagtugot gikan sa Konseho.

Ang konseho na­ngin­labot sanglit alang kanila gi-bypass ang legislative department gumikan sa wa pagkonsulta kanila dihang nipasaka og kaso si Rama batok kang Purisima aron mapabilin si City Treasurer Ofelia Oli­va.

Ang DOF pinaagi ni Purisima nimando nga hulipan si Oliva ni assistant city treasurer Emma Villarete.

Ang kaso gipasaka ni Rama aron mapatuman ang temporary restraining order (TRO).

Sa miaging semana, si Regional Trial Court Branch 5 Judge Dougles Marigomen niisyu og TRO.

Si Rama sa iyang ba­­hin wa mahulga ug ma­­balaka sa kaso nga pla­­nong isang-at batok kaniya sanglit ang Konseho ug ang iyang higpit nga kritiko nga si Osmeña way maayong buhat nga nakit-an kon di ang pagpanaway.

Gipadayag ni Rama nga bisan wa pa gani mahuman ang iyang termino, si Osmeña gusto nang mohulip sa iyang katungdanan.

Masaligon ang pango sa Team Rama nga di molampos ang ilang plano kay nasayod siya nga anaa siya sa husto nga punto uban sa panalangin sa Balaang Bata nga s Señor Sto. Niño, pasabot sa ni Rama.

Ang mga sakop sa Team Rama kinsa sila Konsehal Joey Daluz, Edgar Labella ug Edu Rama ni-abstained sa botasyon.

Apan si Konsehal Ronald Cuenco wa maka-abstain gumikan sa ka busy sanglit ang 10 niya ka mga resolution wa ma­aprobahi.