Mga minor-de-edad nanulis sa mga pasahero sa PUJ

NA-ALARMA na ang kapulisan sa sunod-sunod nga tulis sa sulod sa jeep depasaheroan nga gihimo sa mga batang minor de edad.

Kagahapong adlawa, lain na usab ang PUJ nga gitulis sa MJ Cuenco, dakbayan sa Sugbo sa mga batang minor de edad nga may dalang revolver ug kutsilyo.

Usa ka Lea Nacorda, 35 anyos, nga taga Basak-San Nicholas, ang misumbong sa Waterfront Police Station nga siya gitulis pasado alas 12 ang takna sa tungang gabii.

Mitulis kaniya ang upat ka mga batang minor-de-edad ug nakuha ang iyang bag nga may sulod nga P9,000 ug importanting mga ID.

Sa taho nga nsayran gikan kang SPO4 Ernesto Caballero, ang desk officer sa Waterfront Police, nga sakay nang daan ang mga suspetsado sa PUJ paingon sa siyudad sa Mandaue.

Pag-abot duol sa usa ka lumber, mi­­pahibawo dayon kini nga tulis diin daghan ang nakuha-an nga mga pasahero, apan usa lang ka biktima ang misumbong sa kapulisan.

Wa makatuo ang mga biktima sa maong tulis sanglit mga bata man ang kauban nila sulod sa PUJ.

Matod pa ni Caballero, ang ilang hepe nga si Chief Inspector Andres Bayarcal, ang nakig-alayon karon sa Barangay Tejero, Tinago ug Carreta aron mailhan ang maong mga bata.

Sila nagtuo nga sakop sa “gang” ang suspetsado hinungdan nga kursunada kini nga manulis.

“Ang barangay man maoy unang nahibawo ug nakaila kon si kinsa ning maong mga bata nga manulis diha sa ilang mga area, mao na nga makig-coordinate mi nila,” matod pa ni SPO4 Caballero.