Namana nagapos sa pisi, patay

NAMATAY ang usa ka mananagat human nagapos ang tiil ug ang lawas niini sa pisi nga gihikot sa pana nga gigamit sa pagkuhag isda kagahapon sa alas 1:00 sa kadlawon sa kadagatan sa Barangay Poblacion, lungsud sa Samboan.

Si Ricardo D. Bilocora, 47, taga Barangay Basak, Samboan, milutaw nga walay kinabuhi dihang nakit-an sa iyang kaubang mangingisda nga si Moises Di­no­pol.

Si SPO1 Allan Almedella, sa Samboan Police nga nahinabi sa Sun.Star Superbalita nagka­nayon nga ang managhigala sayo kining namana sa maong dapit.

Si Dinopol mibutyag nga ang biktima nisawom og may lima ka dupa nga gilawmon, pipila lang ka metros ang distansiya kanila.

Apan nakurat nalang siya dihangnakit-an niya ang iyang higala nga nilutaw. Sa iyang pagsusi, iyang nakita nga nalambod ang mga tiil niini sa pisi nga gihigot sa iyang lawas og sa pana.

Dali kining gitabang og gidala sa daplin sa baybayon apan uwahi na ang tanan kay nakabsan gyud kini sa iyang kinabuhi.

“Hilan man gud na ang maong lugar duna namay nangamatay kaniadto kay nalumos sab giti-awan daw pero wala man ko makakita anang giingong ukoy,” sumala pa ni SPO1 Almedella.

Giklaro niini nga walay foul play ang kamatayon sa biktima ug wala usab kini makainom og ilimnong makahubog.

Ang pamilya kunbinsido sab nga walay foul play ang kamatayon sa biktima hinungdan nga gipahipos gilayon og wala na ipa-autopsy ang patayng lawas.