PJ dunay 4 ka ngan nga gipilian

ADUNA nay gikonsiderar nga upat ka mga ngalan ang One Cebu nga maoy mahimong bise gobernador ni Kong. Pablo John Garcia alang sa sunod tuig nga piniliay.

Si Garcia, kinsa nipahibawo nang magpapili sa pagka-gobernador, niklaro nga ang iyang maguwang nga si Gob. Gwen Garcia wa nila gikonsiderar nga maoy mahimo niyang running mate.

“You can scratch her name on the list”, matod sa kongresista nga maoy secretary-general sa One Cebu.

Ang gobernador modagan sa pagka senador ubos sa payong sa United National Alliance (UNA) ni Bise-Presidente Jejomar Binay.

Nalakip na siya sa listahan sa kan­didato sa pagka senador sa Una.

Si Kong. Garcia nipadayag nga may upat na sila ka mga ngalan ning higayona di una niya mahisgutan kay di sila buot nga maglibog ang publiko.

Masaligon siya nga makaporma silang lig-ong pares alang sa partidong One Cebu.

Dihang gipangutana sa mga tigbalita kon ang usa ka negusyante nalakip ba sa ilang gikonsider, si Garcia nga may negusyante silang gilakip sa ilang listahan.

Ang gipasabot mao si negusyante Glen Soco, kinsa interesado gihapon nga modagan sa mao nga puwesto.

“I think I know who you mean. Without mentioning the name. Yes, the name is part of the one we are considering for vice governor,” nagkanayon si Garcia.

Nitataw siya nga ang pagkonsiderar nila sa mahimo niyang pares di lang sa pinaagi sa konsultasyon ug survey apan maayong timbang nga makabuntog sa ilang kaatbang sa Liberal Party.

Ang ikaatbang sa One Cebu mao ang tandem nila ni Hilario Davide III ug Bise Gobernador Agnes Magpale.

Kini human ang Bakud party ni Magpale nakahukom nga mopailawom sa payong sa Liberal Party ug nibiya sa One Cebu.