Sikyu molayat unta sa edipisyo, nasanta

CEBU CITY - Sikyu nga gikatahong gikaaway sa gituohan niyang uyab ug gibuwagan nisuway sa pagpakamatay pinaagi sa pagkatkat sa ibabaw sa building nga iyang gibantayan.

Nilanat og mga upat ka oras ang negusasyon una pa siya nakombinser sa pagkanaog gikan sa ikatulong andana sa building nga wa pay sawog.

Ang nadala sa kapolisan ug gipahiling sa Psychiatric Ward sa Vicente Sotto Medical Center mao si George (di tinuod niyang ngan), 40, taga Barangay Tapilon, Daanbantayan, amihanang Sugbo, security guard sa gitukod nga edipisyo diha sa dalan D. Jackosalem, Barangay Zapatera, dakbayan sa Sugbo.

Tungod sa hitabo, grabe ang pagkabara sa trapiko sa dan Jakosalem ug sa kasikbit nga mga karsada kay ang dapit wa paagii sa mga sakyanan tungod sa kabala kon kini moambak.

Ang iyang gikatkatan nga bahin sa edipisyo naa sa tungod sa karsada ug duol sa Zapatera barangay hall.

Si Inspector Isagani Pogoy, senior duty officer (SDO) sa Cebu City Police Office, nagkanayon nga nianang sayo sa kadlawon, may nakakita kang George nga nagpalit og beer human gikasulti ang usa ka babaye nga gituohang iyang uyab.

Nagtuo ang iyang mga kauban nga siya gibuwagan.

Iyang gitungab ang beer bisan kon di siya tig-inom, matod sa iyang mga kauban.

Gibadlong siya sa iyang mga kauban ug mismo sa laing security guard nga iyang kauban nga si Jun-Jun Moreno Canunay.

Si George day-off pa niadtong orasa ug mao na unta ang mopuli sa pag-duty aron mobantay sa gitukod nga edipisyo.

Matod pa ni Pogoy nga nakakita ang mga kauban nga nisaka si George sa ika tulong andana sa gitukod nga edi­pisyo ug didto nagsigi og yawyaw ug adunay gikasuk-an.

Giingong nagdala usab kini og calculator ingon man gamay nga papel samtang nagreklamo sa iyang suweldo.

Gibadlong siya sa iyang mga kauban apan wa naminaw si George hinungdan nga nanawag na lang og kapolisan ug girespondehan dayon.

Niabot sila si Chief Inspector Bonifacio Garciano, pangulo sa Investigation and Detection Management Bureau (IDMB) ug Superintendent Rex Derelo, pangulo sa Firearms Explosives Security Service Agency and Guards Supervisory Section (Fessags) sa Central Visayas.

Gikombinser siya sa pagkanaog ug gialam-alaman apan wa gyud maminaw.

Pasado alas 9 kagahapon sa buntag, niabot ang iyang ig-agaw ni Rosasina nga wa makuhai og ngalan sa kapulisan ug maoy nihangyo kaniya sa pagpakanaug.

Inubanan nila ni Derelo, wa magdugay naminaw siya ug nikanaug ug dayon gidakop sa kapulisan.

Gidala siya sa VSMMC aron masuta kon naa ba siya sa hustong pangisip.

Hayan pasakaan siya og kasong alarm and scandal.

Si Oliver Clarisan, guard inspector ug collector sa security agency nga gitrabahoan ni George, niingon nga siya off duty si Rosasina niadtong higayona ug wa siyay armas nga gihuptan.

Subay sa nadawat niyang inpormasyon gikan sa mga kauban niini ug sa mga construction worker, sa wa pa ang hitabo, ilang nadunggan si George nga may gikaaway nga babaye samtang nakigsulti sa cell phone.

Human sa ilang panag-estorya, di na masabot si George ug nagsigi na lang og yawyaw hangtod nga migawas sa gitukod nga building, mitabok sa atbang ug nipalit og beer dayong saka sa 3rd floor.

Gihulagway ni Clarisan si George nga hilumon, di palainum mao nga nahibung na lang sila nga kini niinom.