Tibuok lawas napaso

NAPANIT ang tibuok lawas sa usa ka amahan nga aksidenting nadakin-as ug nakuptan ang primary line sa kuryente samtang nanapak sa buslot sa atop niadtong Martes sa udto sa Barangay Dalingding Sur, lungsod sa Medellin, amihanang Sugbo.

Si Vitaliano Rosales, 58, minyo, nagpuyo sa maong lugar, nakaangkon og 3rd degree burns sa kalawasan human siya makuryentihi sa primary line sa Cebeco ll.

Si SPO4 Carlos Condino, imbestigador sa Medellin Police nga nahinabi sa Sun.Star Superbalita, nagkanayon nga ang biktima gisugo sa iyang igsuong babaye sa pagpanapak sa mga buslot sa ilang atop.

Samtang nagtapak sa mga buslot sa sin, aksidenting nadakin-as ug nakuptan niini ang primary line sa Cebeco II nga duol ra kaayo sa atop sa balay.

Tungod sa ka kusog sa kuryente, maayong pagkahilos sa tibuok lawas niini.

“Mibuto ang iyang wa-it sa kakusog sa kur­yente. Ang iyang mga panit nahilos ug nasunog ang sapot,” dugang ni SPO4 Condino.

Gidali siya sa pagdala sa iyang mga kabanay ug silingan sa tambalanan una pa gibalhin sa tambalanan sa dakbayan sa Sugbu.