Security officer mipasangil nga gikulata sa 2 ka pulis

HEPE sa Station 5 sa Lapu-Lapu City Police Office, PSInsp. William Homoc, ug laing pulis, gipasanginlan sa security officer sa usa ka dakong tindahan sa Barangay Basak, Lapu-Lapu nga ningkulata kaniya.

Apan ang police official nanghimakak sa pasangil sa security officer.

Si Roger Mancao, security officer sa tindahan, nihingalan nila ni Homoc ug P02 Philip Von de Lima nga maoy nagtinaba­ngay sa pagkulata kaniya niadtong Huwebes sa ala 1:20 sa hapon sa dihang pugos siya nga gidala sa Marigondon Police Station.

Nasayran nga niadtong Hulyo 3 sa hapon, usa ka menor de edad nga babaye gisikop ni Mancao sulod sa iyang gialagaran nga establisemento sa pasangil nga nag-shoplift og pahumot o perfume.

Iyang gidala ang maong batan-on sa security room diin siya gi-interview apan namasangil ang menor de edad nga gigakos ug gihagkan siya ni Mancao.

Kini human giingong nihangyo nga di ipapriso kay wa siyay ikabayad sa butang nga giingong iyang gi-shoplift.

Dangtan og duha ka mga adlaw, nisumbong ang 15 anyos nga dalagita ngadto sa iyang uyoan nga si Homoc kalabot sa iyang gidangatan sa kamot ni Mancaao.

Si P/SSupt. Rey Lyndon Lawas, hepe sa LLCPO, nagkanayon nga base sa iyang gihimong initial interview sa iyang sakop nga giingong na-involved, nihimo si Homoc og follow-up inabagan sa Marigondon police hi­nungdan nga ilang gisikop si Mancao sa dihang positively indentified sa dalagita nga maoy nimolestya kaniya.

Asoy ni Lawas ngadto sa mga tigbalita nga nilugnot si Mancao sa dihang dad-on na unta sa mga pulis nga posibleng maoy hinungdan nga nakaangkon og garas ug bun-og diha sa iyang kalawasan.

Ang hepe sa Marigondon nga si PInsp. Juan Capacio ang mitunol sa ilang special report kabahin sa insedente ngadto sa buhatan ni Lawas.

Natala ang pamahayag sa menor de edad, kinsa nagtinguha nga mosang-at og kasong acts of lasciviousness batok kang Mancao.

Sigun sa pamahayag sa menor de edad nga igo lang niya nga gisimhot ang pahumot ug wala gyud niya isulod sa iyang bulsa sa dihang kalit siyang gidakop ni Mancao.

Si Homoc nanghima­kak sa pasangil ni Mancao batok kaniya.

Matod niya nga kon tinuod pa kining gihimo niya, makita unta kini sa ubang mga tawo nga diha sa police station niadtong higayuna.

Samtang ang abogado ni Mancao nga si Inocencio dela Cerna personal nga miduaw sa LLCPO detention cell diin gi-detain ang iyang kliyente dala ang dokomento aron kasapakaan og reklamo ang gihinganlan nga mga pulis.

Kasong serious physical injury, torture, grave coercion ug unlawful arrest ang isang-at batok nila ni Homoc ug de Lima.

Sigun sa asoy ni Mancao nga gibunlot siya sa dihang gidala sa Station 4 ug paghiabot sa maong buhatan didto na siya gikulata ni Homoc pinaagi sa pagsumbag ug gituhod ang iyang dughan.

Samtang si de Lima kinsa maoy nagbinaklid og mitaod sa pusas nga grabeng kahugot nga niresulta sa pagpanghubag sa iyang mga pulso dayon gisiko ang iyang nawong dungan sa pag-ingon, “Nakabawos na gyud ko nimo.”

Gitug-an ni Mancao nga una na niyang nasakpan si de Lima nga nag-shoplift sa mall sulod niining tuiga ug giluklok pa ang maong butang diha sa iyang gisul-ob nga jacket.

“Ingon ka Sir (de Lima), 45 (caliber pistol) naa man lagi ning SkinWhite (lotion) ug Pantene (shampoo),” dason ni Mancao diin wala lang niya gipa-blotter agi’g pagtahod sa maong pulis.

Nisaad si Lawas nga mohimo og imbestigasyon kalabot sa maong insedente aron nga masuta ang tinuoray nga nahitabo.