1 patay, 35 angol

USA ang namatay ug 35 ka mga tawo ang nangaangol human ang ilang gisakyang teen-wheeler truck nabalitok human nahagbong sa bung-aw kay nawad-an sa brake niadtong Dominggo sa alas 5:30 sa hapon sa may Sitio Campatok, Barangay Bongon, lungsod sa Tabuelan, Sugbo.

Si PO2 Rico Menchavez sa Tabuelan police nga nahinabi sa Sun.Star Superbalita, nagkanayon nga naangol sab ang driver sa Isuzu truck (GCE-492) nga si Delman Llanto, taga Barangay Poblacion, Tabuelan.

Namatay si Nenita Avinedo, 50, nagpuyo sa nahisgutang lugar, samtang nangaangol ang mga kaubang pasahero nga sila si Renato Comeros, 33, minyo taga Lusong, Tuburan; Cristy Comeros, 12; Francisca Lagnason, 59, Tabuelan; Darrel Tan, 17; Aldrin Paglinawan, 18, taga Tabuelan; Saraniel Arnado, 15; Via Angela Singson, 16, Cabalawan, Bongon, Tabuelan; Benhur Lagnason, 16; Julius Momo, Campoot Tuburan ug Gerllan Singco.

Mga batan-ong mga biktima gikatahong mga tinun-an sa usa ka pampublikong tunghaan.

Si Insp. Roberto Hugo, sa Tabuelan Police nga nahinabi sa Sun.Star Superbalita, nagkanayon nga wa pa nila makumplito ang listahan sa tanang nangaangol kay busy pa ang mga doktor sa tambalanan sa Sogod.

Ang uban gidala sa tambalanan sa dakbayan sa Sugbo ug lungsod sa Tuburan.

Sumala pa niya nga ang mga biktima gikan sa Barangay Mojon, Sogod nga nitambong sa tabo aron makadaginot sa plitihan ug nisakay sa trak de karga nga libre.

Apan sa pag-abot sa dulhugon nga lugar, nawad-an sa sa preno ang sakyanan hinungdan nga nawad-an sa control sa manubila ug nahagbong sa singko metros nga gilawmon sa bung-aw sa tuong habig sa karsada.

Tungod sa pagkabulintang sa sakyanan, ang mga biktima nangalagpot samtang ang uban nangapiit.

Matod ni Hugo nga mga bystanders sa lugar maoy nagtinabangay sa pagdala sa mga biktima sa tambalanan sa Sogod samtang ang ubang mga biktima gisakay sa patrol car sa Tabuelan police ug gidala sa Tuburan Hospital.

Si Avinedo namatay sa tambalanan sa Sogod samtang ang driver kinsa nakaangkon sab og seryusong kadaot sa kalawasan.

Giklaro niya nga di hubog ang driver, kini maoy momaniho sa truck sa iyang amo nga mamaligya sab sa tabo diha sa Sogod panahon sa Dominggo.

Samtang 7-anyos nga batang lalake nalandig sa tambalanan human natapsingan sa motorsiklo samtang naglakaw sa daplin sa karsada sa miaging buntag sa Barangay Butong, lungsod sa Ronda.

Si Johnjay Eramis Gimena, nakaangkon og mga pangos ug bun-og sa iyang kalawasan.

Si PO2 Josephus Paunillan, sa Ronda Police nga nahinabi sa Sun.Star Superbalita nagkanayon nga ang driver sa motorsiklo nga si Benjie Talledo, 27, minyo, taga Barangay Malalay, Ronda, nitahan sa kapulisan ug kasamtangang gitanggong.