69 ka pulis ipaubos sa computer training

ADUNAY 69 ka mga pulis sa dakbayan sa Lapu-Lapu ang gipaubos sa computer proficiency training human niangkon nga kuwang sila sa kahibawo pag-gamit og computer.

Kini ubos usab sa usa sa mga programa ni Police Regional Office Director sa Central Visayas, Chief Supt. Marcelo Garbo human nasuta nga kapin sa mil siyete sientos sa mga pulis ang way kahibawo paggamit og mga computer.

Ang PRO-7 nipahibawo nga ilang nakita ang kamahinungdanon pag-gamit og computer sa inadlaw-adlaw nga gimbuhaton ilabi na sa paghimo sa mga personal report, spot report ug uban pa.

Sa Lapu-Lapu City Headquarters, pinangulohan ni Sr. Insp. Michael Ignacio, ang hepe sa Regional Information Technology office, inabagan sa Digital Forensic Laboratory officers sa CIDG-7, sila maoy nitudlo sa unang batch sa 69 ka mga pulis kalabot sa basic nga paggamit sa computer sama sa microsoft word, office, ug excel.

Gitug-an usab ni Sr. Supt. Rey Lyndon Lawas, ang OIC director sa LLCPO, nga naatol usab ang pagpatuman sa maong programa sa paghatag og napu ka mga units sa computer ni Lapu-lapu City mayor Paz Radaza alang sa mga police.

Matod ni Lawas nga kinahanglanon nga tanang pulis makahibalo sa paggamit sa computer bisan kadtong dugay na sa katungdanan, tungod kay di sa tanang panahon nga diha lang sa operation sila ma-assigns, kon dili mahimo usab sila nga ibutang sa opisina alang sa mga paperworks.

Tungod niini, matod ni Lawas nga atol unya sa ilang meeting sa mga PRO-7 Director Chief Supt. Garbo, iyang itanyag nga mohimo sila og recomendasyon sa mga tunghaan nga nagtudlo og crimino­logy sa pagpalapad sa pagtudlo sa paggamit og computer.