Daghan pa ang mahitabo-PJ

“TAAS pa man ang panahon sa dili pa mag-eleksiyon. Daghan pa ang mahitabo.”

Mao ni ang tubag ni Kong. Pablo John Garcia dihang gikuhaan og reaksiyon sa Sun.Star Superbalita kagahapon labot sa pagdiklarar na og suporta ni Board Member Wilfredo Caminero nga sakop sa One Cebu ngadto kang Hilario “Jun­jun” Davide III, ang gubernatorial candidate sa Liberal party.

Bisan sa maong dek­larasyon ni Caminero, si Garcia nitug-an nga padayon sila nga nakig-estorya sa bokal. Gani, dungan pa sila nga nanihapon sa miaging gabii.

Si Caminero ang unang miyembro sa One Cebu sa Sangguniang Panlalawigan sa Sugbo nga nidiklarar og suporta ngadto kang Davide. Siya ang giingong gipangulitawhan sa kampo ni Davide nga maoy modagan atbang ni Kong. Pablo Garcia, ang amahan nila ni Gobernador Gwen Garcia ug Kong. Pablo John.

Apan suma pa ni LP district chairman Dr. Cora Lou Kintanar nga siya pa gihapon ang congressional bet sa ikaduhang distrito sa Sugbo.

Si Caminero nipa­sabot nga mosuporta siya kang Davide tungod kay iya ning gisaaran sa miaging 2010 election nga kon modagan ni pagbalik pagka gobernador sa lalawigan sa Sugbo sa mosunod nga piliay, mao ni ang iyang paluyohan sanglit matapos na ang ikatulo ug katapusang termino ni Gob. Garcia.

Ang maong bokal kau­ban sila si Bokal Peter John Calderon ug Bokal Thadeo Ouano ang lakip sa mga mitambong sa adlawng natawhan ni Danao City Vice Mayor Ramon “Nito” Durano III ug sa pirmahay sa coalition agreement tali sa LP ug Bakud party nga gitambungan mismo ni Presidente Noynoy Aquino niadtong Sabado sa miaging semana.

Si Pablo John nga maoy padaganon pagka gobernador sa One Cebu atbang ni Davide masaligon nga mayoriya sa mga mayor sa lalawigan ang mopaluyo sa iyang kandidatura.

Wa pa hinuon gipahibawo sa One Cebu kon kinsa ang mamahimong running mate niini atbang ni Bise Gobernador Agnes Magpale nga modagan ubos sa landong sa Liberal party.

Ang gobernador nitug-an nga upat ka mga pangan ang ilang gikonsiderar nga maoy ilang padaganon pagka bise gobernador.

“We are seriously considering four names. We have been listening feedback from our leaders. Gikuha ang pulso sa katawhan...which candidate would be the strongest.” matod niini.