Gipugngan sa SC

GIPUGNGAN sa Korte Suprema ang pagpatuman sa fixed salary scheme sa mga public utility bus drivers ug conductors.

Sa en banc session sa labing taas nga hukmanan kagahapon, niluwat ni og resolution nga ipabilin ang status quo, ang commission scheme, sa wala pa moluwat og kamanduan ang Department of Labor and Employment nga nagmando sa mga kompaniya og bus paghatag og tukma nga sweldo sa mga bus driver ug conductor epektibo niadtong Hulyo 1, 2012.

Si Richard Corominas, presidente sa Cebu Provincial Bus Operators Association nagkanayon nga ilang gihangop ang maong desisyon sa Korte Suprema.

“It is much welcome,” pahayag niini dihang gikuhaan og reaksiyon sa Sun.Star Superbalita kagahapon.

Iyang gipaneguro nga sila mga bus operators sa Sugbo nituman sa paghatag og insaktong suhulan sa ilang mga bus drivers ug operators.

Si Atty. Maria Victoria Gleoresty Guerra, acting public information officer sa Supreme Court, niingon sa mga tigbalita sa kaulohan nga kadtong mga bus driver ug conductor nga wala pa makadawat sa ilang komisyon epektibo niadtong Hulyo 1, kinahanglan nga refundan.

Ang Dole ug Land Transportation Franchising and Regulatory Board (LTFRB) gihatagan og
10 ka adlaw pagduso sa ilang komento labot niini. SCG/abs-cbnnews.com

Ang Provincial Bus Operators Association of the Philippines (PBOAP), Southern Luzon Bus Operators Association, Inc. (SOLUBOA), Inter-city Bus Operators Association (INTERBOA), ug City of San Jose Del Monte Bus Operators Association (CSJDMBOA) nidangop sa labing taas nga hukmanan aron ipaabot ang ilang pagsupak sa kamanduan sa DOLE.

Ang maong mga bus operators nangangkon nga ang maong kamanduan moresulta sa pagkalugi sa ilang negusyo.

Ang DOLE nimando og fixed salary sa mga bus ug conductor tungod sa sunodsunod nga mga aksidente sa kadalanan nga naglambigit og mga bus tungod kay mag-apas sa oras aron makakuha og mas taas nga komisyon.

Sa maong kamanduan, ang mga driver ug conductor dunay normal working hours nga otso oras, kinahanglan ipa-miyembro og Social Security System, Philhealth ug Pag-ibig ug uban pang mga benepisyo.

Si Ahmed Cuizon, director sa LTFRB 7 niingon nga ang ilang legal office sa kaulohan maoy mokomento labot sa desisyon sa Korte Suprema.

Si DOLE 7 director Atty. Gloria Tango nagkanayon nga wala pa sila makadawat og kopya labot sa maong desisyon apan tungod sa status quo order, temporaryo una nila nga undangon ang pag-inspeksiyon sa mga bus operators kon nituman ba sa maong kamanduan. SCG/abs-cbnnews.com