`Gitulis, luguson’ pa unta sa driver

TAXI driver nasikop human nitulis ug nisuway pa unta paglugos sa babaye niyang pasahero pasado alas 6 kagahapon sa buntag sa Quijada st., Barangay Guadalupe, dakbayan sa Sugbo.

Ang driver nga nasikop human sa gukdanay sa grahianan sa taxi sa Mandaue City niangkon nga gikan siya nisuyop og shabu ug pildero sa hantak hinungdan nga siya napugos sa pagtulis sa iyang pasahero.

Ang suspek giilang mao si Ramil Lamoste, 27, taga Brgy. Umapad, siyudad sa Mandaue.

Ang biktima 23 anyos, taga Capitol Site, nagtungha sa usa ka international culinary school.

Matod ni Inspector Gomer Mandaue sa Guadalupe Police Station nga nisakay ang biktima gikan sa Lahug ug magpahatod unta sa tunghaan.

Apan sa pag-abot sa Quijada st., kalit lang nga gipawong sa driver ang makina sa
sakyanan ug nagpasumangil nga na-beriya.

Giingong kalit lang giitsahan og t-shirt ni Lamoste ang nawong sa pasahero dungan sa pagtion og screw driver kaniya ug nihulga nga siya patyon.

Nisulti ang suspek sa pasahero nga gusto siyang makig-sex niini.

Wa magpadala sa kahadlok ang pasahero, iyang gipa­tiran ang driver hinungdan nga siya nakahigayon sa paggawas sa sakyanan apan nabiyaan ang iyang bag nga may sulod nga duha ka mga cell phone, kwarta ug personal nga mga butang.

Nagdagan nga nisinggit og tabang ang pasahero hangtod nga iyang nasugatan ang usa ka lalake nga nagmaniho sa motorsiklo ug dayon gigukod ang taxi.

Wa magdugay nibalik ang mao nga lakake nga nipahibawo sa pasahero sa ngalan sa maong taxi ug gihatud ang biktima sa police station sa Guadalupe.

Si Mandaue, uban sa iyang mga sakop, niadto dayon sa Mandaue City diin magrahian ang taxi uban ang biktima.

Ang pasahero positibo nga niila sa suspek subay sa retrato nga iyang nakita gikan sa opisina sa taxi company.

Wa magdugay, niabot ang suspek nga mograhi na unta.

Si Lamoste nga nakabantay sa presensya sa kapulisan daling nidagan ug nahitabo ang ginukdanay.

Ang suspek nakasulod sa usa ka balay sa maong dapit.

Pinaagi sa pagkooperar sa tag-iya sa balay, nasakpan ang suspek nga didto nitago sulod sa pansayan hangtod nga nasikop.

Nakuha gikan kaniya ang bag sa pasahero uban sa mga butang ingon man lima ka linikit nga mga marijuana.

Gikatakda nga pasakaan og tukmang mga kaso ang suspek.

Atol sa imbestigasyon, ang suspek nitug-an nga migamit siya og drugas ug pildero sa sugal.

“Nablangko na kuno siya kay wa na siyay kwarta. Niangkon sad siya nga gikan siya nagsuyop ug nagsugal,” matod ni Mandaue.

Samtang si Mandaue City police official Chief Insp. Michael Anthony Bastes niawhag sa mga taxi operator sa pagsusi og maayo sa background sa ilang kuhaon nga mga driver.

Kini aron malikayan nga badlungon nga driver ang ilang makuha.

Iya usab nga giawhag ang mga pasahero nga sa di pa mosakay, timan-an ang ngan sa taxi, body number ug plate number niini aron sayon ra ang pag-ila kon maghimo og illegal ang driver niini.