Pagbaligya’g sticker sa helmet gikuwestion ni Mayor Rama

GIKUWESTIYON ni Cebu City Mayor Michael Rama ang pagpapilit og import commodity clea­rance (ICC sticker) sa Bureau of Product Standards (BPS) diin ang Department of Trade and Industry maoy mo pro­seso alang as paghatag Ug kalig-unan sa helmet sa mga motorista.

Kini nunot sa nag­singabot nga implementasyon sa RA 10054 kon Motorcycle Helmet Act nga ipatuman na sa Land Transportation Office (LTO) lukop nasod karong buwan sa Agusto.

Ang mayor supak sa pagkolekta og P100 sa DTI sa matag motorista isip processing fee sa di pa hatagan og ICC sticker.

“Kana gyung butangbutang og sticker paghuman. Unsa may purpose ana (pangwarta)? Mao lagi na kahibawo bitaw mo, I’m always against pangwarta,” pabuhagay ni Rama.

Si Sylvan Jakosalem, chairman sa Citom Board, una nang niingon nga mas angayan untang himuon nga libre ang ICC sticker.

Alang sa mayor aduna pay daghang susihunon sa maong balaud sanglit gusto niya nga did-an na paggamit ang mga full-face nga helmet nga dili na maklaro ang mga nawong.

Kini gumikan sa dag­hang mga panghitabo dinhi sa Sugbo nga gamiton sa mga kriminal hilabi na sa mga mamumuno nga magsakay og motorsiklo ug magtaptap pa sa ilang nawong.

Gihulagway ni Rama nga di kaayo kinahanglan ang full face helmet sa siyudad kay way dagko ug tag-as nga karsada sa dakbayan.

Ang Cebu City niadto pang 1977 nagsugod og pagpanakop sa mga motorista nga di mag helmet pinaagi sa amahan ni Rama kinsa si late councilor Fernando Rama.

Si Rama nihatag na og go signal sa Citom nga di mopatuman sa RA 10054 kay aduna pay daghang atimanunon ang dakbayan og iyang gitugyan ngadto sa LTO ni Director Raul Aguilos ang pagpatuman sa maong balaod.