Pamisita nabulabog

PAMISITA nabulabog human ang balay sa babaye nga iyang gibisita gisulod sa nakabonnet nga mga tulisan niadtong Dominggo sa alas 9:20 sa gabii sa Sitio Lumboy, Barangay Abucayan, lungsod sa Balamban.

Way nahimo si Ricky Combista, 21, welder sa Methaphil, taga Barangay Arpili, Balamban, dihang gitiunan siya og armas lakip ang iyang uyab nga si Lynvie Narsico, 20, dalaga.

Nakuhaan sila sa ilang silver necklace ug mga cell phone.

Hinuon, usa ka 17-an­yos nga gidudahang apil sa tulis nasikop sa kapulisan apan ang 30-anyos nga kauban niini nakaeskapo.

Si PO2 Godofredo Dumdum sa Balamban Police nga nahinabi sa Sun.Star Superbalita nagkanayon nga si Combista namisita kang Narsico.

Nag-estoryahay sila sa sulod uban sa ilang mga higala nga sila si Rhea Gin Llenes, 18, ug Joven Diamante 20 dihang nisulod ang mga suspetsadong tulisan nga nag-bonnet nga nagdala og armas.

Ningdeklarar kini ig tulis, samtang ang laing duha ka mga tulisan nga naka-bonnet didto sa gawas nagsilbing lookout.

Ang mga tulisan way nadalang kwarta dihang ilang giutingkay ang lawak sa tagbalay hinungdan nga gipanghimulbulan ang mga biktima sa ilang mga alahas.