Pulis kritikal, trabahante patay sa mga aksidente

GRABE ang kahimtang sa usa ka pulis samtang usa ka trabahante sa Mitsumi sa Danao City namatay human sa ma­naglahing mga aksidente sa dalan sa probinsiya sa Sugbo niadtong Lunes sa tungang gabii ug kagahapon sa buntag.

Si PO1 Kenneth Bandong, 34, minyo, sakop sa Talisay Police, taga San Jose Village, Barangay Lawaan, dakbayan sa Talisay, kasamtangang giatiman sa mga doctor sa South General Hospital (SGH) sa dakbayan sa Naga human nakaangkon og grabing kadaot sa iyang kalawasan.

Si SPO1 Jaime Mendoza sa Sibonga Police nga nahinabi sa Sun.Star Superbalita nag­kanayon nga si Bandong nagsakay sa iyang motorsiklo paingon sa lungsod sa Argao mga alas 11:30 sa gabii niadtong Lunes.

Sa iyang pag-abot sa Sitio Gahad, Barangay Poblacion, nawad-an siya og control sa manobela sa iyang pagliko sa kurbadang karsada.

Hinungdan nga ang iyang motorsiklo nidiretso sa pagkabangga sa plantbox ug nalagpot dayon nahagbong sa gamay nga kanal.

Siya gidali sa pagdala sa tambalanan sa dakbayan sa Carcar, apan tungod kay seryoso ang kahimtang, gibalhin sa SGH sa dakbayan sa Naga.

Si Insp. Hugo Rio Ipong, deputy police chief sa Talisay Police nga nahinabi sa Sun.Star Superbalita, nagkanayon nga ila pang estoryahon ang asawa ug pamilya ni Bandong aron masuta kon asa gyud siya mopadulong niadtong niadtong Lunes sa gabii.

Gipadayag ni Ipong nga wa gyud nila maestorya ang maong pulis sanglit seryuso kaayo ang kahimtang niini.

Ang pulis maoy team leader sa Motorcycle Cop sa Talisay Police.

Lakip sa ilang gisuta kon duty ba kini o off duty atol sa maong insedenti.

Samtang sa laing aksidente, namatay ang usa ka kawani sa Mitsumi human mapasok ang iyang motorsiklo sa gikasugat nga Ceres Bus mga alas 6:30 kagahapon sa buntag sa national highway sa Barangay Estaca, lungsod sa Compostela.

Si Ruel Inoc, 26, minyo, taga Barangay Poblacion Occidental, lungsod sa Consolacion, namatay human nabali-bali ang kabukogan dihang napasok sa Ceres Bus (GXZ-916) nga gimaniho ni Ronilio Alarde, 50, minyo, taga Sunrise Village, Barangay Pardo, dakbayan sa Sugbo.

Si PO2 Fedilito Jopia, desk officer sa Compostela police nga nahinabi sa Sun.Star Superbalita, nagkanayon nga ang Ceres bus gikan sa Hagnaya Wharf sa lungsod sa Medellin paingon sa dakbayan sa Sugbo.

Sa pag-abot sa may Barangay Estaca, ni-overtake kini sa laing sak­yanan.

Akto sab nga gikasugat niini ang motorsiklo nga gimaniho sa biktima nga paingon mo-duty sa Mitsumi.

Matod ni Jopia nga tungod sa kakalit sa insidente, wa na maka-brake ang driver sa bus hinungdan nga head-on ang ilang panagbanga sa motorsiklo.

Ang biktima uban sa iyang motorsiklo napasok sa ilawom sa bus ug naguroy pa kini pipila ka metros hinungdan sa pagkabali-bali sa kalawasan niini.

Hinuon mitahan ang driver sa kapulisan human sa insedenti ug gitanggong na sa kapulisan.

Matod sa driver nga wa gyud niya tuyoa ang aksidente.

Kasong reckless imprudence resulting to homicide with damages to property ang giandam sa kapulisan batok kang Alarde.