Mantayupan Falls kalit nga mihubas

NAKURATAN ang mga residenti ug lokal nga mga opisyal human kalit nga nihubas ang Mantayupan Falls hinungdan nga nangliksi ang mga isda sa sapa sa Barangay Mantayupan, lungsod sa Barili niadtong Martes sa buntag.

Si Chief Insp. Marlon Gumabao, hepe sa Barili Police nga nahinabi sa Sun.Star Superbalita, nagkanayon nga nabalik na hinuon kagahapon sa buntag ang tubig sa Mantayupan human gitabonan ang bangag diin didto nipunta ang tubig.

Sumala ni Gumabao nga giayo ang karsada sa lugar samtang dunay gipanguhang mga bato daplin sa sapa, diin usa ka dakong bato nga diha sa daplin sa sapa giapil sa pag-ugkat.

Apan sa kahibulong sa mga personnel sa usa ka negusyanteng giila lang nga Tanchan kalit nga nihubas ang sapa, hinungdan nga gitapuk-an gilayon sa mga residente.

Ang tubig, inay mosubay sa sapa nga may gilay-on nga tulo ka kilometro paingon sa Mantayupan Falls, ni-divert sa dakong lungag human makuha ang bato.

Ang mga trabahente ug residenti nahibulong ug nagtuo nga sinkhole ang maong dapit.

Matud pa ni Gumabao nga gibutangan gilayon niyag duha ka pulis ang lugar, ingon man warning sign aron di paduolan sa mga tawo kay dilikado kon dunay mahagbong.

Hinuon nabalik ang tubig sa sapa kagahapong adlawa human gibubo-an og 50 ka dump tuck sa mga filling materials ang lungag.

Samtang ipasusi ni Barili Vice Mayor Marlon Garcia sa Mines and Geosciences Bureau (MGB) ang mao nga hitabo.

Matod ni Garcia nga kinahanglang masusi kon unsay hinungdan sa kalit nga wa pag-agas niini.

Buot usab ni Garcia nga masusi kon may “sinkhole” ba kining dapit nga giagian sa tubig nga nidagayday ngadto sa Mantayupan Falls.

Ang bise mayor nibutyag sa Sun.Star Superbalita kagabii nga nibalik na sa normal ang dagan sa tubig gikan sa sapa ngadto sa falls.

Ang tinubdan sa tubig sa Mantayupan Falls anaa sa Barangay Mantayupan samtang ang gidagaydayan sa tubig anaa sa Barangay Campangga ug anaa sa boundary sa Mantayupan ug Barangay Nasipit ang gikatahong bangag nga nisuyop sa tubig hinungdan nga wa na moagas ang falls.

May mga molupyo nga nitug-an sa Sun.Star Superbalita nga ang dapit nga may bangag karon giingong gisigehag kuhag bas sa usa ka negusyante nga may negusyo sa dapit.

Gitumbok nila ang usa ka Tanchan nga naghimog resort sa dapit nga may fish pond ug green house.

Ilang gitumbok nga dihang ang dakong bato giingong natandugan sa backhoe nga nagsigeg kuhag bas nahubsan ang Mantayupan Falls.

Hinuon, daling gitambakan sa mga sakop ni Tanchan ang giingong lungag busa nibalik na sa normal karon.