Gipusil, naitlog

NAPUSGAY ang itlog sa usa ka ulitawo human siya gipusil samtang nag­lakaw gikan sa disko kagahapon sa ala 1:05 sa kaadlawon sa Sitio Tangadlawan, Barangay Bakhawan, lungsod sa Daanbantayan.

Si Christopher Areg­lado, 20, ulitawo, taga Barangay Paypay sa maong lungsod ug mag-uuma sa katubhan, nawad-an sa iyang walang itlog human naigo sa bala sa 357 nga revolver.

Nasikop hinuon ka­gahapon sa alas 6:00 sa buntag ang suspek nga si Aldie Moralde, 19, ulitawo, mag-uuma usab sa katubhan ug taga Barangay Bakhawan.

Si PO3 Dennis Velez, desk officer sa Daanbantayan Police nga nahinabi sa Sun.Star Superbalita, nagkanayon nga ang biktima uban sa iyang higala nga si Edmar Codella dihang nahitabo ang pagpamusil.

Ang biktima gikan sa Sitio Mojon, Barangay Bakhawan nitambong sa disko Sabado sa gabii, ug kagahapon sa kaadlawon namauli nga nag­lakaw sa karsada.

Apan sa pag-abot nila sa Sitio Tangadlawan, kalit lang nibutho ang suspek ug walay daghan pangutana, gipusil ang bik­tima hinungdan sa pagkaigo sa iyang wa­lang itlog.

Ang suspek kalit lang nahanaw sa ngitngit nga dapit ug wala maaabti sa mga niresponding kapulisan.

Si SPO1 Mamemerto Gastador, imbestigador sa Daanbantayan Police nga nahinabi sa Sun.Star Superbalita nag­ka­nayon nga si Areglado daling nakapangayog tabang sa police assistance center sa nahisgutang lu­gar uban sa iyang higala.

“Sa pag-abot niini ngadto sa assistance center mipadayag nga samtang nagpislitpislit sa iyang “itlog” unya mikunpermar nga nabungkag gyud ang akong wala nga itlog Sir,” dugang ni SPO1 Gastador.

Dali kining gidala nila sa tambalanan sa Da­anbantayan apan gipabalhin sa doktor dinhi sa dakbayan sa Sugbo aron mapadali ang pag-opera niini.

Ang biktima nga nagping-it sa kasakit sa pagkawala sa iyang walang itlog, human nasentro sa pagka-igo sa bala nga nilapos sa iyang bugan.

Matud pa ni SPO1 Gastador, nga ang suspek nga nadakpan sa ilang mga kauban kagahapon sa alas 6;00 sa kaadlawon sa ilang panimalay niangkon sa krimen tu­ngod sa iyang pagdumot niini.

Nanimalos ngadto sa biktima tungod kay nasukmagan siya niini niadtong Hunyo 29, atol sa usa ka liga sa basketball sa ilang lugar diin sila magkaaway.

Gusto unta niining mo­bawos sa pagsukmag apan wala siya makasukol kay daghang mga kauba­nan ang biktima hinungdan nga kagahapon sa kaadlawon nakahiga­yon siya sa pagbawos niini dihang nitambong sa disko.

Ang suspek nitug-an nga 357 ang iyang gigamit nga armas sa pagpusil sa biktima, apan iyahang nalabay dihang nisibat siya hinungdan nga nawagtang.