Mga drayber ipaubos sa seminar

“DRAYBER nga way seminar!”

Komon kini nga balikas sa mga tawo batok sa mga drayber nga abu­sado sa karsada.

Aron makabaton og maayong pamatasan sa pag­maneho, ang mga bus ug mini bus driver sa Sugbo ipaubos sa usa ka adlaw nga training ug seminar sa Technical Education and Skills Development Authority (Tesda) karong Huwebes nga ipahigayon sa University of Cebu-Mamba­ling campus.

Ang mga opisyal sa Cebu South Mini Bus Operators Association ug Cebu Provincial Bus O­perators Association maoy nanghangyo sa Tesda nga mopahigayon niini alang sa kaayohan sa ilang mga drayber.

Si Julieto Flores, presidente sa CSMBOA nag­kanayon nga gawas sa maayong pamatasan, tudloan usab ang mga drayber og defensive dri­ving, first aid, personal hy­giene ug pagtahod sa lagda sa trapiko ug mga traffic signs.

Mga opisyal gikan sa Land Transportation Franchising and Regulatory Board, Emergency Rescue Unit Foundation, Traffic Management Group ug Tesda ang pipila sa mga speaker sa maong seminar.

Si Flores niingon nga ang pagpahigayon og training ug seminar pagtamod sa memorandum circular sa LTFRB nga nagmando sa mga bus ug mini bus operators nga bansayon ug seminaron ang ilang mga drayber.

Usa ni sa mga rekisito sa LTFRB sa paglukat o pag-renew og certificate of public convenience (CPC) sa mga bus ug mini bus operators.

Matod ni Flores nga kapin sa 200 ka mga drayber ang gipaabot nga motambong niini nga dunay bayranan nga P100 matag usa.

Nonot niini, maapek­tahan og gamay ang biyahe sa mga bus ug mini bus sa habagatang bahin sa Sugbo.

“Dunay gamay nga pagkunhod sa biyahe sa mga bus ug mini bus pero dili sila angay mabalaka (ang mga pasahero) tu­ngod kay duna may nauna nga mga drayber nga napaubos na sa training sa miaging tuig,” pasabot ni Flores dihang nahinabi sa Sun.Star Superba­lita kagahapon.

Ang pagbansay ug pagseminar sa mga bus ug mini bus driver makatabang paglikay sa mga aksidente sa kadalanan nga naglambigit sa maong mga klase sa sak­yanan.

Sa Senado, si Senador Francis “Chiz” Escudero nanghingusog nga mapalabang ang iyang giduso nga Senate Bill No. 2085 nga magpahamtang og mas bug-at nga silot ngadto sa mga bus driver nga nalambi­git sa mga disgrasiya sa kadalanan.

Ubos sa iyang propo­sal, ang mga drayber nga nalambigit og disgrasiya mabilanggo gikan sa upat ka buwan ug usa ka adlaw ngadto na sa unom ka buwan ug 12 ka tuig depende sa kaso sa mga nangaangol, ug 12 ka tuig ngadto sa 20 ka tuig nga pagkapriso sa mga kaso nga dunay nangamatay.

Ubos sa Revised Penal Code, ang penalty sa malapason nga mga drayber gilatid nga usa ka buwan ug upat ka tuig ug duha ka buwan nga pagkapriso depende sa gibug-aton sa nahitabo nga aksidente.