Tanod sa ‘Lacion naghikog, patay

BARANGAY tanod sa lungsod sa Consolacion ang naghikog pinaagi sa pagpusil sa iyang ulo hinungdan sa iyang hinanaling kamatayon.

Ang namatay giila nga si Alfredo Alin, 62 , minyo, arangay tanod ug uyoan ni Barangay Kapitan Edwin Alin sa Barangay Danglag sa samang lungsod.

Hinuon, ang kabanay sa namatay wala magtuong dunay foul play ang hitabo.

Ang sakit niini nga diabetes maoy ilang gituohang gikagul-an pag-ayo niini hinungdan nga nagpakamatay.

Si PO1 Baltazar Francisco nga nahinabi sa Sun.Star Superbalita niingon nga si Kapitan Alin maoy nanawag kanila ug nagpahibawo labot sa hitabo.

Base sa pasiunang pakisusi, ang asawa sa namatay nisulod sa ilang kuwarto pasado alas 7:00 sa buntag niadtong Sabado, aron pakan-on ug paimnon og gatas.

Apan nibalibad ug nagsigeg hilak paglabay sa pipi­la ka minutos nakadungog nalag boto sa armas ang iyang mga anak ug asawa.

Sa gihimong pakisusi naligo na sa kaugalingong dugo ang namatay ug naghupot pa sa kalibre .38 nga adunay upat ka buhing bala ug usa ka kabhang.

Ang kapulisan sa Consolacion ug mismo ang kabanay sa namatay wala magtuo nga adunay foul play ang maong hitabo sanglit hugot ang ilang pagtuo nga naghikog kini tungod sa iyang gihambong nga sakit nga mao ang diabetes, samtang nikomplikar na sa iyang atay ug kasingkasing.