Tubig sa falls sa Barili, mibalik na

NIDAGAYDAY na og balik ang tubig sa Mantayupan niadtong Sabado sa hapon human sa gihimong diversionary river nga gihimo sa mga lumolupyo sa dapit uban sa kagamhanan sa lungsod sa Barili.

Si Barili Mayor Teresito Mariñas nitug-an sa Sun.Star Superbalita kagahapon nga niadtong Sabado sa alas tres sa hapon nahibalik na ang pag-agas sa falls.

Matod ni Mariñas nga gipaliko nila ang sapa unya giabungan nilag mga sand bag aron di na kini moagi ngadto sa sinkhole.

Ang mayor nipahibawo nga temporaryo lang una ning lakang ang ilang gibuhat kay tinguha nila nga sa higayon nga wa na unyay tubig ang sinkhole ilang tam-ukan unya sementuhon kini aron maka­balik nag-agi ang tubig sa dapit.

Iyang gipahibawo nga gikalipay kaayo sa mga nananom og humay ug ang nagbuhi og mga tilapia nga nahibalik na ang agas sa falls.

Nahibalik na usab ang operasyon sa mini-hydro.

Nasayran nga niadtong milabayng semana kalit nga wa moagas ang falls human didto na sa sinkhole punta ang tubig.